Ipisu 4:31 - Manobo Western Bukidnon

³¹ Engkezi niw is kebpekunkuntedehè niw. Kenè kew meepes wey mepauk te zuma niw. Kenè kew pekid-eg̵et; kenè kew ituk; kenè niw itug̵ut he ibmezaat te g̵ehinawa niw is minsan hengkey he ulaula te zuma niw,

Ipisu 4:31 Kruisverwysings

Nengeulaula 21:30

Ne ingkepauk haazà te langun he meg̵inged dutun te Hiruselim ne nengevurun dan ne migewezan dan si Pablo, ne miguyud dan sikandin pehendiyà te g̵awas dutun te simbahan ne midlekevan dan haazà is simbahan.

Ruma 3:14

Utew mesakit is kebpenrawak dan.

1 Kurintu 14:20

Kinahanglan, menge suled, he kenà iring te ked-isip te menge vatà is ked-isipa niw kayi. Iyan dà ulaula te vatà he meupiya he ed-iringan, haazà is kenè dan kegketueni te ked-isip te mezaat. Iyan, kinahanglan he iring te ked-isip te meg̵urang is ked-isipa niw kayi.

1 Kurintu 5:8

Ne tenged kayi, duen en daan kenitew he kedsilibra te Pista te Kedlevayi ne kinahanglan he kenè tew en maan egemiten is daan he supas he zuen din tapey he iyan is mezaat wey meremerik he ulaula, kekenà, iyan tew en egemiten is supas he wazè din tapey, he ke và dà egkeg̵iya, is kedtumana te tutuu he tuluuwen wey is kedtudtula te tutuu.

2 Kurintu 12:20

Egkesamuk is gehinawa ku su kela ke zutun te kebpekeuma ku ziyan ne iyan ku egkeahà diyan te keniyu is menge ulaula he kenè ku egkesuatan. Ne emun iyan haazà ne zuen ed-ul-ulahan ku zutun he kenè niw zaan egkesuatan su kinahanglan he edsewayen ku is keniyu he ulaula. Su kela ke zuen ebpekigkuntada ziyan te menge zuma zin, kela ke zuen egkesina, duen petuluy egkepauk, wey leg̵ezen, kela ke zuen diyan ebpenemperasà wey edsulà te zuma zin, kela ke zuen bereituk. Kela ke zuen diyan te keniyu gelbuwen, wey kela ke wazè niw kebpekid-uyun te menge tumutuu.

Gelasya 5:20

is ked-ezapa te kenà hustu he ed-ezapen, wey is kegemita te g̵ehem he ibeg̵ey ni Setanas. Ebpekigkuntada is menge etew; ebpekidtebek dan; egkesina zan; egkengepauk dan; iyan dà ed-isipen dan is kandan dà he egkesuatan. Ne ed-engkezan dan is kebpekidsevaha zan te menge zuma zan.

Ipisu 4:22

Tenged kayi engkezi niw is menge isip te zaan he kegkeetew niw su nesakup heini te zaan he menge mezaat he ulaula niw. Ebpekezezaat keniyu heini pinaag̵i te ebpemekelimbung he kebayè din.

Ipisu 4:25

Umba, menge suled, engkezi niw is kedtarùtarù. Kinahanglan he tutuu is egkeg̵iyen niw ziyà te menge zuma niw. Su nesevaha kiw he pudu parti te lawa ni Kristu.

Ipisu 4:26

Emun duen igkepauk niw tigkera niw is gehinawa niw su kela ke ibpekesalè niw. Ne kinahanglan he te kenè pa edsanlep is andew iawè niw en is pauk te isip niw.

Kulusas 3:19

Ne sikiyu zaan is menge maama, mahala niw is esawa niw; kenè niw sikandan henghenggeri.

Kulusas 3:8

Ne g̵untaan, kinahanglan he ed-iniyug̵an ta is minsan hengkey he mezaat he ulaula iring te kegkepauk wey kebpekigkuntada te zuma he etew, is kebpesipala, is ked-ituk wey is meremerik he kegkag̵i.

1 Timoteo 3:11

Iring din ded daan is bahi he esawa te diyekunu su kinahanglan he telehuzen sikandin. Kenà menge vereituk, kekenà, egketengkaan is ked-isipa zin te langun wey egkengeserig̵an te minsan hengkey he meupiya he ulaula.

1 Timoteo 3:3

Kenà sikandin lelenguten; kenà sikandin ebpemeg̵espeg̵es, kekenà, metulanged sikandin. Edlikayan din is samuk ne kenà susuaten te selapì.

1 Timoteo 5:13

Ne kenà duen dà taman su melemu zan ebpetetapul ne layun dan ebpenumbaley ziyà te menge valey, ne kenà iyan dà haazà su egkehimu zan daan he vereituk, ne ebpekekevut dan te wazè dan kelavet duen ne ebenteenan dan is kenà meupiya he ebenteenan.

2 Timoteo 2:23

Iyan, kenè ka penlavetlavet dutun te menge winalì wey pinaglung he ed-istudyuwan. Netuenan nu en he iyan haazà puunà te kebpekid-eg̵et.

2 Timoteo 3:3

Kenè dan ebmahalen is menge zuma zan; kenà egkeawà is pauk dan. Bereituk sikandan; kenè dan egkeeg̵en is menge mezaat he kebayà te lawa zan. Utew zan mevurut ne wazà minsan hengkey he meupiya he ulaula he kenè dan egkeepesan.

Tito 1:7

Ne g̵eina te insarig kandin te Megbevayà is kedumala te menge tumutuu, kinahanglan he wazà supak din. Kenà sikandin mebmandarmandar zà; kenà sikandin eengeren. Kinahanglan he kenà sikandin lelenguten, kenà sikandin ebpemeg̵espeg̵es ne kenà iyan dekelà diyà te g̵ehinawa zin is selapì.

Tito 2:3

Ne iring ded daan dutun is penurù nu ziyà te menge meg̵urang en he vahi. Kinahanglan he layun igkesuat te Megbevayà is menge ulaula zan. Kenà sikandan pereituk, kenà sikandan pereinum te vinu. Kinahanglan he layun dan ipenurù is meupiya he ulaula

Santiago 1:19

Kenè niw lipati, menge minahal ku he suled, he is minsan hentei kenitew, kinahanglan he layun andam he ebpemineg te Lalag te Megbevayà ne kenè ta ipetuwas is kenita zà he lalag ne kenè ki zaan melemu he egkepauk.

Santiago 3:14

Iyan, emun egkesina sikandin wey mepelevawen, kinahanglan he kenè din izantal is ketau zin wey is meupiya he ulaula zin su tarù is ketau he iring dutun ne ebpekesupak te tutuu he tuluuwen.

Santiago 4:11

Menge suled, kenè kew mebpesudsudiey wey mebpesewsewayà su is edsudì wey edsawey te zuma zin he tumutuu, ne iring te edsudien din wey edsewayen din is lavew he sug̵ù. Ne emun edsewayen ta haazà is sug̵ù, kenè ta edtumanen, kekenà, edsumpeliten ta.

1 Pedro 2:1

Ne g̵eina te veg̵u ki en he etew, ed-iniyug̵an te en is minsan hengkey he kebpesipala wey is kedtarùtarù. Kinahanglan he kenà tarù is kedsundan ta te Megbevayà; kenè ki egkesina ne kenè ki ebpemenulà.

1 Juan 3:12

Kenè tew ed-iringan si Kain su sakup sikandin ni Setanas ne mibunù din is hazi zin. Umba mibunù din su mezaat is kandin he ulaula ne metazeng mulà is menge ulaula te hazi zin.

1 Juan 3:15

Is minsan hentei he ebpekigkuntada te zuma zin, mid-isip sikandin te Megbevayà he iring te teremunù; ne netuenan ta he ke zuen etew he egkesuat he ebunù wazè pa sikandin mekeangken te untung he wazà pidtemanan.

Impezayag 12:10

Ne zutun, nezineg ku is utew mezag̵ing he egkag̵i ziyà te langit he edhenduen te, “Guntaan egketuman en is kedlibriya te Megbevayà te menusiyà. Impeehè en te Megbevayà is keg̵ehem din te kedhadì. Is hadì he mibpilì te Megbevayà, impeehè din en is ketenged din te kedhadì. Su midsegseg en pehendiyà te tanà si Setanas, is edsumbung te menge suled tew. Iyan sikandin midsumbung kandan diyà te Megbevayà tew te maandew wey te mezukilem.