1 Timoteo 6:20 - Manobo Western Bukidnon

²⁰ Sikew Timoteo, purungi nu tumana is tuluuwen he insarig kenikew. Likayi nu is menge etew he supak te Megbevayà is kegkag̵ikag̵i zan. Likayi nu zaan is kunaan te zuma ke tutuu en he ketau.

1 Timoteo 6:20 Kruisverwysings

Nengeulaula 16:1

Ne midlaus ensi Pablo ziyà te menge inged he Dirbi wey Listera. Ne zuen sumusundan ni Jesus he meg̵inged dutun he egngezanan ki Timoteo. Is iney zin, ne Hudiyu he tumutuu zaan, asal is amey zin ne Gerisyahanen.

Nengeulaula 17:18

Ne zuen dutun menge menunudlù te menge penurù dengan ni Ipikuranu wey ni Sinu. Mibpekidibati zan daan ki Pablo. Ne is duma zutun egkag̵i te, “Paglung heini he mepedelig̵en. Hengkey vuwa pezem is egkeg̵iyen din?” Ne is duma egkag̵i te, “Iyan buwa ibpesavut din is menge selakew pa he menge ziwata he edsimbahan diyà te meziyù he inged.” Umba egkekag̵i zan haazà su impesavut kandan ni Pablo is keag̵i ni Jesus wey is kegkevanhew zin.

Nengeulaula 17:21

(Umba egkekag̵i zan haazà su is menge tig-Etinas wey minsan is menge umuuliey zutun, utew zan egkesuat he ebpemineg wey ebpenudtul te menge penurù he sikan dan pa mezineg minsan ke egkehepunan pa.)

Ruma 1:22

Ne minsan pa te egkeg̵iyen dan he metau zan he ed-isip, iyan, nehimu zan en he menge taleng.

Ruma 3:2

Iyan, dekelà iyan is pulus su sikami is menge Hudiyu, insarig kenami is insurat he Lalag te Megbevayà.

1 Kurintu 2:6

Ne haazà is menge etew he mezesen is kedtuu zan te Megbevayà, duen ketau he ibpesavut ku kandan, asal, is ketau he ibpenurù ku kandan ne kenà daan ebpuun te etew zà duen wey ziyà te menge pengulu he iyan ebayàbayà dini te kelibutan su egkeewaan en heini te menge g̵ehem dan.

1 Kurintu 3:19

Su is ketau kayi te kelibutan, ne wazè din pulus diyà te Megbevayà su utew lavew is kandin he ketau. Su zuen insurat he Lalag te Megbevayà he edhenduen te, “Is ketau te metau he etew he igkelupig̵i zin te zuma, egkehimu he iyan ibpekesipè din te selaid te Megbevayà.”

Kulusas 2:18

Duen daan menge etew he egkag̵i he lavew sikandan tenged te zuen kun menge egkein-inuwan he impaahà kandan wey tenged te kenè dan mepelevawen. Ne ibpenurù dan he kinahanglan he ebpekeazap ki te menge velinsug̵uen te Megbevayà ziyà te langit. Kenè niw, menge suled, itetenged is kedsudì dan keniyu su is iring dutun he etew, ne ebpezalig dà, iyan, wazà hustu he ketezengan te kebpezalig dan su iyan ebayàbayà te isip dan is kelibutanen he kebayè dan.

Kulusas 2:8

Andam kew su kela ke zuen egkabig keniyu pinaag̵i te kebpenurù te tuluuwen he tarù ne wazè din pulus su imbilinbilin dà te menge etew. Kenà haazà hustu he tuluuwen su kenà ebpuun diyà te ki Kristu.

2 Tiselunika 1:4

Ne tenged kayi emun ebpenumbelayan dey is menge tumutuu te Megbevayà diyà te minsan hendei he inged, ebentug̵en dey sikiyu tenged te kedsarig niw te Megbevayà wey tenged te kebmeinentusen niw te menge kemeresayan wey kemereg̵enan he egkeseg̵azan niw.

2 Tiselunika 2:15

Ne tenged kayi, menge suled, pekezesen kew te kedtuu niw, ne hemeni niw is langun he impenurù dey keniyu pinaag̵i te kedwali zey hein diyan key wey pinaag̵i zaan te kebpesurati zey keniyu.

1 Timoteo 1:11

Ne heini is hustu he tuluuwen, ne ebpuun te Meupiya he Tudtulanen mehitenged te utew zekelà he g̵ehem te Megbevayà. Is Megbevayà he iyan dait he edelig̵en, insarig din kedì heini is tudtulanen wey ku mesangyew.

1 Timoteo 1:4

wey med-engked dan te ked-istudyu te menge sayep he menge g̵ug̵ud, wey te menge melug̵ayad he g̵ug̵ud te kepuun te menge etew. Su emun iyan heini ed-istudyuwan dan ebpekidlewanè dan dà ke hengkey is hustu. Kenà egkehimu he pinaag̵i kayi egketuenan ta is ibpesavut te Megbevayà pinaag̵i te kedtuu.

1 Timoteo 1:6

Duen diyan menge etew he wazè dan meseg̵ipà heini. Iyan dan impelavi is kebpekidlewanà mehitenged te wazè din pulus.

1 Timoteo 1:9

Iyan, wazà isug̵ù heini su wey mezawey is menge metazeng he etew, kekenà, insug̵ù heini su wey mezawey is menge mesinupaken, menge kenà metinumanen, menge kenà edtuu te Megbevayà, menge selaan, menge lalung wey menge kenà edtahud te Megbevayà, menge ebunù te amey wey iney zan, menge teremunù,

1 Timoteo 4:7

Iyan, likayi nu is menge penurù he menge tarù he g̵ug̵ud he kenà dait te Megbevayà. Purungi nu tumana is egkesuatan te Megbevayà.

1 Timoteo 6:11

Ne sikew mulà, sulug̵uen ka te Megbevayà; likayi nu is langun he iring kayi he menge ulaula. Hemeni nu is metazeng he ulaula, is kedtumana te egkesuatan te Megbevayà, is kedsarig kandin, is kegkeg̵eg̵awi nu te menge zuma nu, is kebmeinentusen te menge supak dan, wey is kelinew te ulaula nu.

2 Timoteo 2:1

Sikew, Timoteo, is iring te tutuu he anak ku, heg̵eta nu is kedtuu nu su zekelà is tavang te Megbevayà kenita tenged te nekidsevaha ki ki Jesu Kristu.

2 Timoteo 2:16

Likayi nu is winalì he kebpenurù he kenà egkesuatan te Megbevayà, su pinaag̵i zutun ed-iseg is kenà kedtahud kandin te menge etew.

Tito 1:14

ne wey zan meengkezi is kedtuu zan te menge tetezemen te menge Hudiyu wey te menge kelibutanen dà he sug̵ù he mibeelan te menge etew he edsumpalit te tutuu he tuluuwen.

Tito 1:9

Kinahanglan he zutun te kebpenurù din, kenè din suwayi is tutuu he tuluuwen he iyan impenurù ta. Su emun iyan ibpenurù din is tutuu he tuluuwen, egkeheg̵et is kedtuu te ebpememineg kandin ne igkepesavut din he utew nengesayep is edsumpalit te penurù din.

Tito 3:9

Iyan, likayi nu is winalì he kebpekidlewanà te menge etew. Likayi nu zaan is ked-istudyu te menge g̵ug̵ud te menge ngazan te menge kepuun te etew he iyan baal zan. Ne elin nu zaan likayi is kebpekid-eg̵et dan mehitenged te kedtumana te kesug̵uan he imbilinbilin ni Moises. Wazà pulus te langun kayi su ebpekezezaat.

Impezayag 3:3

Kenè niw lipati is impenurù keniyu he midawat niw zengan, kekenà, hemeni niw ne ewaa niw ziyà te g̵ehinawa niw is kenè niw kedtuu. Su emun kenè niw ed-iniyug̵an is menge ulaula niw he mezaat, ebeyaan ku sikiyu zutun te timpu he kenà a keniyu ebpeebuten su iring te tekawen is kebpekeuma ku.