1 Timoteo 6:17 - Manobo Western Bukidnon

¹⁷ Is menge tumutuu he mezakel is menge azen dan, keg̵iyi nu he kenè dan mebpelavew wey kenè dan medsarig te menge azen dan su kenè ta egketuenan ke keenu ki egkeewai te menge azen ta. Keg̵iyi nu he iyan dan serig̵i is Megbevayà su iyan sikandin metulanged. Is minsan hengkey he naazen ta, imbeg̵ey zin kenita wey mebmeupiya is kebpekesavuk ta.

1 Timoteo 6:17 Kruisverwysings

Mateo 12:32

Sikan is edsumpalit kedì te Kakey te Menusiyà, egkepesaylu pa; iyan, sikan is edsumpalit te Wag̵as he Mulin-ulin, kenè en egkepesaylu te wazè din pidtemanan.

Mateo 19:23

Ne zutun migkag̵i si Jesus diyà te menge sumusundan din te, “Utew mereg̵en te sepian he etew is kebpesakup din te Megbevayà wey mehedii sikandin.

Mateo 25:16

Ne sikan is sulug̵uen he mibeg̵ayan te lelima he libu he pisus, impetig̵ayun din haazà is kandin, ne netig̵ayun te lelima pa he libu.

Mateo 27:57

Ne hein mahapun en dutun, nekeuma is sepian he ebpuun te Erimetiya. Iyan ngazan din si Jose; ne sumusundan daan sikandin ni Jesus.

Mateo 6:32

Iyan heini igkeseeng te menge etew he wazà medtuu te tutuu he Megbevayà. Iyan, is Amey tew he Megbevayà he ziyà te langit, netuenan din he zaan he egkinehenglanen niw is iring kayi.

Marcos 10:24

Ne is menge sumusundan din, hein nezineg dan haazà is migkag̵i ni Jesus, utew zan ingkeinuinu. Ne mid-uman megkag̵i si Jesus te, “Utew mereg̵en te etew is kebpesakup din te Megbevayà wey sikandin mehedii.

Lucas 19:2

Ne zuen dutun maama he tigHiriku he egngezanan ki Sekiyu. Ne haazà si Sekiyu, ne iyan egalen te menge menunukut te vuhis dutun; ne sepian daan utew sikandin.

Lucas 3:11

Ne midtavak ni Juan sikandan te, “Sikan is etew he zezuwa is kumbalè din, ne veg̵ayi zin sikan is wazè din kumbalà. Ne iring din ded daan sikan is etew he zuen din keenen, ne veg̵ayi zin sikan is wazà egkekaan,” ke sikandin.

Nengeulaula 14:17

Iyan, minsan pa zutun, egketuenan ta g̵ihapun ke hentei sikandin pinaag̵i te menge pengelimuan din kenitew. Su ebeg̵ayan ki zin te uzan wey veg̵as te menge pinemula ta emun tirag̵un. Ibeg̵ey zin kenitew is egkinehenglanen tew wey zuen keuyag̵an tew ne zuen ibmeupiya te g̵ehinawa tew,” ke sikandan.

Nengeulaula 14:27

Ne hein nekeuma zan diyà te Entiyukya, midtig̵um dan is menge tumutuu ne midtudtul zan is langun he nehimu te Megbevayà pinaag̵i kandan wey is kedhimuwa zin te paag̵i wey meketuu is menge etew he kenà Hudiyu.

Nengeulaula 17:25

ne wazà minsan hengkey he egkeveelan te etew he egkinehenglanen din. Su iyan sikandin ebeg̵ey te g̵ehinawa wey untung wey is minsan hengkey ziyà te langun he menge etew.

Ruma 11:20

Ne venar iyan he iyan kew in-ilis, iyan, umba in-awà is menge Hudiyu te Megbevayà su wazè dan medtuu. Ne umba in-ilis kew kandan su midtuu kew mulà. Ne minsan pa te iyan heini, kenè niw isipa he iyan kew lavew, kekenà, tegteg̵ami niw is menge ulaula niw.

Ipisu 5:5

Su ibpesavut ku keniyu is utew tutuu. Is etew he meremerik is ulaula zin wey ke edhilavet te kenè din esawa, ne kenà sikandin egkehedian ni Kristu wey te Megbevayà. Ne iring din ded daan is leg̵ezen he etew su is menge vutang he igkeleg̵ezi zin, egkehimu he menge megbevayè din.

Kulusas 3:16

Menge suled, layun niw zewata is impesavut ni Kristu. Pepempenuruey kew wey mebpesemsembag̵è kew sumalà is ketau te kada sevaha. Kanta kew te menge idalig te Megbevayà, wey menge Salmo, wey elin daan is menge kentahan he ibpinted keniyu te Wag̵as he Mulin-ulin. Kentahi niw is Megbevayà he utew zekelà is kebpeselemati niw kandin.

1 Tiselunika 1:9

Nezineg dan en ne iyan sikandan ebpenudtul mehitenged te kegelg̵elawa niw kenami. Ebpenudtul zan he mid-engkezan niw kes ked-azap te menge kenà tutuu he ed-ezapen. Mid-engkezan niw kun wey kew mekeazap te tutuu he Megbevayà he wazè din kemetayen.

1 Timoteo 1:3

Ed-umanan ku egkeg̵iya kenikew is sambag ku hein mid-awà a ziyan pehendiyà te Mesidunya. Iyan is: kenè ka med-awà diyan te Ipisu. Iyan idsembag̵i ku kenikew su zuen menge etew ziyan he kinahanglan he zewaya nu. Dewaya nu he med-engked dan te kebpenurù te menge sayep he tuluuwen

1 Timoteo 3:15

Umba ebpesuratan ku sikew su kela ke mesanggen a. Ne emun egkesanggen a egketuenan nu g̵ihapun ke hengkey is hustu he ed-ul-ulahan he zait tew te menge anak te Megbevayà. Iyan kiw iglisya, he ke và dà egkeg̵iya, menge tumutuu te wazè din kemetayen he Megbevayà. Iyan kiw kes menge tukud wey vangel he zutun mekesavuk is tutuu he tuluuwen.

1 Timoteo 4:10

Tenged kayi ebpenigudu ki edhag̵ù wey metuuwi heini te langun he menge etew su nekesarig ki en te wazè din kemetayen he Megbevayà ne iyan sikandin Menluluwas te langun he menge etew, lavew en is menge tumutuu kandin.

1 Timoteo 5:21

Edteleenan ku sikew he purungi nu tumana heini is insug̵ù ku kenikew. Iyan ebpeketistig̵us kayi is Megbevayà, si Jesu Kristu, wey is menge pinilì din he velinsug̵uen. Kinahanglan he te minsan hengkey he ed-ul-ulahan nu wazè nu zepig̵i he minsan hentei. Ke edhusey ka kinahanglan he iyan nu pemineg̵a kes ebpekevenar.

1 Timoteo 6:13

Ebpeketistig̵us is Megbevayà wey si Jesu Kristu he ebpeketelteleenan ku sikew he purungi nu tumana he wazà sayep is insug̵ù ku kenikew taman te kenè pa edlikù is Nengazen tew he si Jesu Kristu. Is Megbevayà, iyan ebpengelintau he meuyag is langun he menge linimbag din; ne si Jesus, iyan nekepenistig̵us mehitenged te tutuu he tuluuwen diyà te etuvangan ni Punsyu Pilatu.

1 Timoteo 6:9

Is menge etew he egkesuat he medsepian, melemu sikandan egkepenulayi wey egkeseleizi. Mezakel is menge suat dan he wazà pulus ne ebpekezezaat heini. Ebpekezezaat heini kandan wey egkehimu zaan he ibpatey zan heini.

2 Timoteo 4:10

su mid-ewaan a ni Dimas tenged te iyan egkenug̵unan din is untung din dini te kelibutan. Midhendiyà sikandin te Tiselunika. Ne si Krisinti, midhendiyà te Gelasya, ne si Tito zaan, midhendiyà te Delmasya.

Tito 2:12

Ne pinaag̵i zutun te g̵ag̵ew egkesavut ta he kinahanglan he meengkezi ta is menge ulaula he kenà igkesuat te Megbevayà wey is kedtumana ta te menge suat te lawa ta zini te kelibutan. Kinahanglan he ed-eg̵enen ta is menge kebayà ta he mezaat. Kinahanglan daan he metazeng wey igkesuat te Megbevayà is menge ulaula ta te zini ki pa ed-ubpà te kelibutan.

Tito 3:6

Midhimu te Megbevayà he mepurung ki meulini te Wag̵as he Mulin-ulin pinaag̵i te kebpehimatey ni Jesu Kristu he Menluluwas tew.

2 Pedro 1:11

ne zekelà is kelipey tew keuzemà su egkeg̵alew is Megbevayà kenitew zutun te kebpeseleza zin kenitew zutun te wazà pidtemanan he g̵inhedian te Nengazen tew he si Jesu Kristu he iyan Menluluwas tew.