1 Pedro 2:24 - Manobo Western Bukidnon

²⁴ Iyan si Kristu midsilutan tenged te menge salè tew zutun te kedrensanga kandin diyà te krus. Umba iyan sikandin midsilutan su wey tew meengkezi is menge mezaat he ulaula ne wey tew iyan meulaula is metazeng. Is menge palì din dutun, ne iyan nekevawì kenitew.

1 Pedro 2:24 Kruisverwysings

Mateo 27:26

Ne zutun midlibri ni Pilatu si Berabas. Ne impevug̵el zin si Jesus ne insug̵ù din te menge sundaru he iransang dan si Jesus diyà te krus.

Mateo 5:20

Egkeg̵iyan ku sikiyu he wey kew zà egkehedii te Megbevayà ke edtumanen niw is egkesuatan te Megbevayà ne kinahanglan daan he lavew kew pa he metinumanen kenà is menge menunudlù te kesug̵uan wey is menge Perisiyu.

Mateo 8:17

Umba mid-ulaula zin heini su egketuman dutun kes netagnà dengan ni Esaias he ebpeneuven te Megbevayà, he egkag̵i te, “In-awè din is menge zaru tew ne mibewian din is menge ebpenggezamen tew.”

Marcos 15:15

Ne zutun midlibri ni Pilatu si Berabas wey zin mepenunuat is gehinawa zutun te menge etew. Ne impevug̵el zin si Jesus ne insug̵ù din te menge sundaru he iransang diyà te krus.

Lucas 4:18

“Mid-ulinan a te Wag̵as he Mulin-ulin he ebpuun te Megbevayà. Ne mibpilì a te Nengazen su wey ku ikepesavut te menge egkengeayuayu is Meupiya he Tudtulanen. Ne mibpeveyaan din kedì is menge etew wey ku sikandan metudtuli he egkengevelukasan is nengevihag ni Setanas, ne egkengeulian is nengelakap wey zan mekeahà ne egketevangan is egkengereg̵enan.

Juan 1:29

Hein mid-ilis he andew zutun, naahà ni Juan si Jesus he edhendiyà te kandin, ne ke si Juan diyà te menge etew, “Iyan heini sikan is etew he egngezanan te ibpemuhat he Nati he Kerehidu he ibeg̵ey te Megbevayà su pinaag̵i kandin egkeawà is menge memezaat he ulaula te menusiyà.

Juan 19:1

Ne zutun insug̵ù ni Pilatu he ipevug̵el si Jesus.

Nengeulaula 10:35

su is meg̵inged te minsan hengkey he inged dini te kelibutan, emun edtehuzen din is Megbevayà wey metazeng is ulaula zin, edewaten sikandin te Megbevayà.

Nengeulaula 10:39

Ne sikami, ebpekepenistig̵us key kayi su neehè dey is langun he mibeelan din diyà te langun he menge inged te menge Hudiyu wey ziyà daan te Hiruselim. Ebpekepenistig̵us key zaan he midhimetayan sikandin te menge Hudiyu pinaag̵i te kedrensanga kandin te krus.

Nengeulaula 13:29

Ne hein nengeulaula en te menge tigHiruselim kes langun he netagnà dengan he ibpeulaula zan kandin, in-awè dan is lawa zin dutun te krus he midrensangan dan kandin ne inleveng dan.

Nengeulaula 5:30

Mibunù niw si Jesus su inransang niw te krus, iyan, is Megbevayà he edsimbahan te menge kepuun tew, mibanhew zin si Jesus.

Ruma 6:11

Ne iring din ded daan, tentenuzi niw he g̵eina te minatey ki en he zuma ki Kristu, naawè en daan dini te kenita is kegkesemuki kenita te salè ta, ne pinaag̵i zaan ki Jesu Kristu imbeg̵ey en kenita is beg̵u en he untung, ne kinahanglan he igkezalig daan te Megbevayà heini is beg̵u en he untung ta.

Ruma 6:13

Kenè ta egemiten is minsan hengkey he vahin te lawa ta te ked-ulaula te mezaat, kekenà, idtug̵ut ta he iyan ebayàbayà kenita is Megbevayà su zait heini kenita te nelibri en te kemetayen ne mibeg̵ayan te veg̵u en he untung. Ne idtug̵ut ta he iyan egamit te lawa ta is Megbevayà wey ta meulaula is metazeng.

Ruma 6:16

Su netuenan niw he ke ebpesakup ki te minsan hentei su wey ki zin meveyveyai, egkehimu ki en he iring te uripen din. Ne iring din ded daan is etew he ebpilien din he iring te egalen din is mezaat he kebayè din. Ne idsilut kandin is kemetayen he wazè din pidtemanan. Ne is etew mulà he ebpesakup te Megbevayà ne ed-isipen te Megbevayà he metazeng sikandin.

Ruma 6:2

Ne kenà heini egkehimu su kenà egkehimu he ebpeniguduwan ta te ed-ulaula is mezaat su wazè en kelavet kenita te mezaat he ulaula. Su iring ki te minatey he naawè en diyà te kandin is daan he untung din.

Ruma 6:22

Iyan, guntaan, nevelukasan ki en te Megbevayà, ne nelibri ki en te kebpekeulaula ta te mezaat. Ne tenged kayi menge sulug̵uen ki en te Megbevayà, ne utew zekelà is pulus kayi kenita su ebpeketuman ki en te egkesuatan din, ne iyan rimeg̵as kayi te mid-ulaula te Megbevayà is kegkeveg̵ayi kenita te untung he wazà pidtemanan.

Ruma 6:7

Su is minsan hentei he minatey en, ne kenè en sikandin egkeuripen te mezaat he kebayè din.

Ruma 7:6

Ne hein nemeketuu kiw ki Jesus, nelibri kiw te Megbevayà ne wazè en kinahanglan he iyan tew pa edserig̵an is kedtuman te kesug̵uan, su zutun te kebpatey ni Jesus minatey kiw zaan ne nevelukasan kiw te kegkeuripen kenitew te salà. Ne g̵untaan beg̵u en is paag̵i te ked-ul-ulaha tew te egkesuatan te Megbevayà su pinaag̵i heini te kedtavang te Wag̵as he Mulin-ulin, ne kenè en pinaag̵i te zaan he paag̵i he iyan is kenitew he kedtumana te insurat he kesug̵uan.

1 Kurintu 15:3

Ne lavew kayi te langun he impesavut ku keniyu, haazà is impenurù daan kediey. Ne iyan is: si Kristu, mibpehimatey su wey kiw melibri te silut mehitenged te menge salè tew sumalà is impesavut dengan te insurat he Lalag te Megbevayà.

2 Kurintu 6:17

Ne tenged kayi migkag̵i zaan is Megbevayà te, “Suwayi niw is ebpemen-azap te kenà tutuu he ed-ezapen ne sivey kew kandan. Engkezi niw is minsan hengkey he meremerik he ulaula ne edewaten ku sikiyu.

Gelasya 3:13

Minsan pa te nesupak te en is kesug̵uan, nelibri ki ni Jesus te silut su midrewakan en si Jesus he elili kenitew zutun te kedrensanga kandin te krus, su zuen insurat he Lalag te Megbevayà he edhenduen te, “Ke zuen etew he edhimetayan ne idtaud te impasek he kayu ne tuus heini te rawak kandin te Megbevayà.”

Ipisu 5:9

Su emun neteyawan te Megbevayà is isip niw, egkeulaula niw is langun he hustu wey metazeng he vaal he ibpenurù te tutuu he tuluuwen.

Pilipus 1:11

Ne zutun egkeveelan niw is minsan hengkey he metazeng he ulaula tenged te g̵ehem he ibeg̵ey ni Jesu Kristu su wey mezalig wey mevantug is Megbevayà.

Kulusas 2:14

Ne minsan pa te wazè kiw medtuman te insurat he kesug̵uan din, pinaag̵i te kebpatey ni Kristu ziyà te krus, in-awè din is kesug̵uan ne tenged kayi wazè en igkesiluti zin kenitew.

Kulusas 2:20

Na, menge suled, geina te iring te minatey ki en duma ki Kristu, wey kenè ki en maan egkeveyveyaan te menge kenà hustu he tuluuwen, kinahanglan he kenè kew en maan mebpemineg te menge sug̵ù te menge etew he menge kuntada te Megbevayà. Menge sug̵ù heini te menge etew zà duen. Egkag̵i zan he zuen menge egkeenen he kenà ibpekaan kenitew te Megbevayà, ne minsan is kegezami wey is kegewezi zà kayi ne wazè din kun itug̵ut kenitew. Kenè niw, menge suled, pemineg̵a is iring dutun su wazà pulus te idawey zan su emun egkeenen tew is egkeenen ne egkeawà heini.

Kulusas 3:3

Umba egkeg̵iyen ku heini su sikita is tumutuu, minatey ki en duma ki Kristu ne is tutuu he untung ta pinaag̵i kandin, wazè pa heini ipezayag te Megbevayà.

Hibriyuhanen 10:10

Ne g̵eina te midtuman ni Jesu Kristu is egkesuatan te Megbevayà, nengepalis is menge salè tew pinaag̵i te kesevaha zà he kebpemuhata zin te keugelingen din he lawa.

Hibriyuhanen 10:5

Ne egketuenan ta heini su zutun te timpu zengan he nekeuma si Kristu zini te kelibutan, migkag̵i sikandin diyà te Amey zin he Megbevayà te, “Kena iyan is menge ibpemuhat he ayam egkesuatan nu, kekenà, midlimbag nu is lawa he egkeg̵amit ku, ne iyan heini egkesuatan nu he ibpemuhat.

Hibriyuhanen 12:13

Peniguduwi niw te ed-ikul is hustu he ibayà su wey kenà luyahi is menge zuma niw he mehugkà is kedtuu zan, kekenà, melig-eni is kedtuu zan.

Hibriyuhanen 7:26

Iyan si Jesus lavew he memumuhat he egkinehenglanen tew su wazà igkesewayi te menge ulaula zin, wazè din salà, ne wazè din sayep. Ne kenà sikandin iring te menge mekesesalà he menusiyà, ne midhimu sikandin te Megbevayà he lavew te minsan hentei ziyà te langit.

Hibriyuhanen 9:28

Ne si Kristu zaan, kesevaha zà is kebpehimatey zin he iyan kebpemuhata zin te lawa zin wey zin maawà is menge salà te utew mezakel he menge etew. Ne ed-uman pa ebulus si Jesus dini te kelibutan, kenà te ked-ewaa zin te menge salè tew, kekenà, edhimesazen din is kedlibriya zin te langun he utew zekelà is perateng dan kandin.

Santiago 5:16

Ne tenged dutun kinahanglan he petudtudtulè kew te menge salè niw su wey iampù te kada sevaha is duma zin ne wey meulii is egkengezeruwan. Utew mekeg̵eg̵ehem is ked-ampù te metazeng he etew.

1 Juan 2:29

Netuenan te en he metazeng si Kristu. Netuenan ta zaan he minsan hentei he metazeng is menge ulaula zin, nehimu en sikandin he anak te Megbevayà.

1 Juan 3:7

Menge anak ku, kinahanglan he kenè niw pemineg̵a is minsan hentei he teruen he ebpenurù pezem keniyu. Iyan tutuu is: ke zuen etew he ed-ulaula te hustu ne iyan sikandin metazeng he etew iring te metazeng si Kristu.

Impezayag 22:2

Ne haazà is wahig, diyà edtudà te teliwazà te kersada zutun te inged. Ne te pesiziveluyà he veyvey zutun te wahig egkeahà is menge kayu he ebpekeveg̵ey te untung. Ne haazà is kayu, sepulù wey zezuwa he kelasi is beg̵as din ne kada vulan ebpemeg̵as te sengekelasi. Ne is dahun dutun, ne vawì he ebpekeulì te menge etew he sakup te menge g̵inhedian dini te lumpad.