Umbwilo 8:3 - Amazwi Yakwe Leza 2013

³ Lyene mungeli namuze, aiiza aimilila nkolelo ya kavuwa, ala alemile iciinga cakwe zaabu. Alino yamupeela ubani wingi kuti aupeele pamwi na mapepo ya antu yakwe Leza yonsi aoce pa kavuwa kakwe zaabu kano kali nkolelo ya cilimba ca wene.

Umbwilo 8:3 Kruisverwysings

1 Yamwene 7:50

Wapanzile ni ngako zyakwe zaabu musuma cuze, ni vyakuzimizya inyali, ni ngeso zya kukanyizizya, ni mbale ni vifutikilo, alino ni vilemelo vyakulemela ivisasa vyamu Ncende Yamuzilo kuluta nga ni vya visasa vya muputule ukalamba wa Ng'anda ikulu yakwe Yawe. Vyonsi pyu vyapangilwe kuli zaabu.

Masamu 141:2

Ipepo lyane likwele kunuli wa ubani, nu kutumpula kwa makasa yane, kuye wa mpolelwa ya manguzi.

Kufuma 40:26

Mwi Taalu lya Ukongano aikamo kavuwa kakwe zaabu, ku nkolelo ya nsalu ya kucinga,

Ezaya 6:6

Alino selafi wenga apapukila panondi, aiza ni kala lya moto lino waliwapala nu lumano pa kavuwa.

Ezekelo 41:22

Apa wingililo wa Muputule Wamuzilo Ukuluta, pali penepo icintu cimwi icalolekanga wa luvuwa lwa mbao. Nalo lwatalimfile mita wenga na citika, nu mu kusalala namo mita wenga. Yaupangile ni mbao zitupu ukutandika sile uku matungi, apapela nu mu mbali kwene. Nga alino umuntu wilya atandika ukunena ati, “Lii ali tebulo ilyaya apa cinso cakwe Yawe.”

Amosi 9:1

Naweni Yawe ala aimi apipi na kavuwa. Wene wavwanzile ati, “Kunulini incesi zya Ng'anda ikulu yakwe Yawe, kuti umufula wakweyo utente. Muziongolwele pa mitwe ya antu. Yayo asyala ndayakoma umu nkondo. Kusi umwi wino alaleuka. Kusi umwi wino aluutuka.

Malaki 1:11

Antu aikala amasi yonsi yalancindika. Konsi kwene antu yalaoca ubani nu kupeela amawila aswefiwe mwi zina lyane. Pasi pano antu amu nko zizyo yalancindika.

Mpendwa 4:11

Pa kavuwa kakwe Zaabu, napo yali nu kuvimbapo insalu ya cifungo, ino nupya yalinzile yafupa mu mpapa zinyukwe ningo nu kusomekamo mipingilo.

Mpendwa 7:62

Alino ni mbale yonga yakwe zaabu ino tungati yanyomile kota wenga wakwe kilogalamu, umwali ubani.

Luka 1:10

Lyene iumba lyonsi lya antu lyali panzi, ala likupepa pa kasita ka koca ubani.

Loma 8:34

Uzye lyene aweni angayavunuka? Vino Leza umwisikulu wati yasi na mulandu. Klistu Yesu wino uwafwile, nupya uwazyukwike kufuma ku mfwa, wino ndakai wikala kwi kasa lilunji lyakwe Leza, akutupapatila kunoli.

Ayebulai 7:25

Acino na ndakai kwene wene akweti maka akutuula yao akaiza kuli Leza kupitila munoli. Pano wene uwa umi manda pe pa kuyapapatilako kuli Leza.

Ayebulai 9:4

Muu umwali kavuwa kakwe zaabu pano yocelanga ubani. Mwali (Alaka) mbokosi ya upangano ino yapomilwe na zaabu monsi kwene. Nu mukasi mwisilwe musazi wakwe zaabu muno mwali mana, nsonzo yakwe Aaloni iyawalwile maluwa, nga ni vipampa vya mawe viili ivyalemvilwepo masunde.

Umbwilo 10:1

Nupya ndola mungeli namuze uwa maka ala akwika kufuma mwiyulu. Wene wakufilwe mwi kumbi nu mulalamfuti wazingulwike mutwe wakwe. Cinso cakwe calolike wi lanzi, ni ngazo zyakwe zyalolike wa cimbilimbili ca moto.

Umbwilo 14:18

Lyene kwiza mungeli muze wino ali na maka pa moto wino wafumile ku kavuwa. Alino apunda ni zwi likulu ku mungeli wino wakweti cikwakwa cikali ati, “Tola cikwakwa cako ciomvye mukuputula matingi mu calo ca matingi ca mu nsi, pano matingi yati yaca!”

Umbwilo 5:8

Lino akucita vii, viumbwa vyaumi vini pamwi na ikolo makumi yaili na yani yafukamila Mwana wa mfwele. Cila wenga wakweti zeze nga ni ngeso zyakwe zaabu izyazilemo vya mununko usuma nga navyo vili mapepo ya antu yakwe Leza.

Umbwilo 6:9

Lyene Mwana wa mfwele alematula cimanyililo calenga visano. Alino pisika lya kavuwa ndola mipasi yakwe yao akomilwe pamulandu wakuti yene yakosozile mazwi yakwe Leza na pamulandu wa umboni uno yapile. Yene yapunda ni zwi likulu yati,

Umbwilo 7:2

Alino ndola mungeli namuze kufuma ku ufumondaka ala alemile nsimbi yakwe Leza wa umi. Lyene apunda ni zwi likulu ku angeli yani yano Leza wapile maka akonona insi na yemba.

Umbwilo 8:4

Ni cunsi ca ubani uno wapyanga cayanga mupela pamwi na mapepo ya antu yakwe Leza kufuma mu minwe ya mungeli wino waimi nkolelo yakwe Leza.

Umbwilo 8:5

Alino mungeli atoola iciinga, azuzyamo umoto kufuma pa kavuwa, nga acisumbila pano nsi. Lyene kuya ciunda nu kupangalansya, kumyansya kwa nkuwa ni cilundumusi.

Umbwilo 9:13

Alino mungeli walenga mutanda alizya ntandala yakwe. Nga nuvwa izwi likufuma mu matungi yani a kavuwa kakwe zaabu kano kali nkolelo yakwe Leza.