Восьтӧм 3:8 - Коми Библия 2023

⁸ ”Ме тӧда тэнсьыд уджъястӧ. Со, Ме восьті тэ водзын ӧдзӧс, и некод оз вермы тупкыны сійӧс. Дерт, тэ жеб, но видзин Менсьым кывъясӧс да эн соссьы Менам нимысь.

Восьтӧм 3:8 Kruisverwysings

Шусьӧгъяс 30:9

Коланасьыс унджык мед оз ло менам, ӧд сэки ме верма бергӧдчыны Тэысь, верма шуны: «Ог тӧд Господьӧс». А гӧльма кӧ, пета гусясьны да Тэнсьыд нимтӧ, Енмӧй, янӧда.

Даниил 11:34

Сьӧкыдсӧ нуигӧн найӧ оз кольны отсӧгтӧг, но уна йӧз наянпырысь ӧтувтчасны накӧд.

Лука 12:9

Коді соссяс Меысь йӧз водзын, сыысь Ме сосся Енлӧн анделъяс водзын.

Иоан 15:20

Кутӧй тӧд выланыд Менсьым кывъясӧс: кесйӧг абу ыджыдджык аслас ыджыдысь. Менӧ кӧ вӧтлісны, вӧтласны тшӧтш тіянӧс. Менсьым кывъясӧс кӧ кывзісны, кывзасны тшӧтш тіянлысь.

Иоан 17:6

Ме восьті Тэнсьыд нимтӧ йӧзыслы, кодъясӧс Тэ сетін Меным муюгыдсьыс. Найӧ – Тэнадӧсь, Тэ Меным сетін найӧс. Найӧ видзисны Тэнсьыд кывтӧ.

Ап. уджъяс 14:27

Воӧм бӧраныс найӧ чукӧртісны эскысьясӧс да висьталісны ставсӧ, мый вӧчис на пыр Енмыс, кыдзи Сійӧ восьтіс ентӧдтӧмъяслы эскӧмас ӧдзӧссӧ.

1 Коринфӧ 16:9

ӧд Енмыс меным паськыда восьтіс ӧдзӧсъяс уджавны. Дерт, и паныд сувтысьыс уна.

2 Коринфӧ 2:12

Кор ме локті Троада карӧ висьтавлыны Кристос йылысь Бур Юӧрсӧ, Господь восьтіс меным ӧдзӧс сэні уджавны.

Филипӧ 4:13

Ставсӧ верма менӧ ёнмӧдысь Исус Кристоскӧд!

Колосӧ 4:3

Кевмысьӧй тшӧтш миян вӧсна, Енмыс мед восьтас миянлы ӧдзӧсъяс висьтавны Кристос йылысь гусяторсӧ. Дзик та вӧсна ме и пукала дзескыдінын.

1 Тимофейлы 5:8

Коді оз тӧждысь матыссаыс вӧсна, торйӧн нин гортсаыс вӧсна, сійӧ эновтӧма эскӧмсӧ да эскытӧм дорысь лёкджык на.

2 Тимофейлы 4:7

Ме бура вермаси, помӧдзыс котӧрті, эскӧмӧс видзи.

Иуда 1:4

Тіян пӧвстӧ наяна сюйсисны Ентӧг олысьяс. Татшӧм йӧзыслы важӧн нин дасьтӧма мыждӧмсӧ. Миян Енлысь буралӧмсӧ найӧ бергӧдӧны лэдзчысьӧм оласногӧ. Найӧ соссьӧны ӧти Ен Ыджыдысь да миян Господь Исус Кристосысь.

Восьтӧм 2:13

Ме тӧда тэнсьыд уджъястӧ. Тэ олан сэні, кӧні сӧтаналӧн юралан пуклӧсыс, но тэ зумыда кутчысян Менам нимӧ. Тэ эн соссьы Меным эскӧмысь весиг сэки, кор тіянын, сӧтана оланінын, виисны Антипаӧс – Менсьым эскана висьталысьӧс.

Восьтӧм 2:2

Ме тӧда тэнсьыд уджъястӧ, мырсьӧмтӧ да зумыдлунтӧ. Тӧда, тэ он терпит лёк йӧзӧс. Тэ тӧдмалін найӧс, кодъяс нимтӧны асьнысӧ апостолъясӧн, но збыльвылас найӧ абу апостолъяс. Тэ аддзин, мый найӧ – пӧръясьысьяс.

Восьтӧм 22:7

«Со, Ме регыд локта! Шуда сійӧ, коді олӧ тайӧ небӧгас водзвыв висьталӧмыс серти!»

Восьтӧм 3:1

«Сардис вичкоса анделлы тадзи гиж: Со мый висьталӧ Сійӧ, кодлӧн эм Енлӧн сизим лолыс да сизим кодзув. Ме тӧда тэнсьыд уджъястӧ. Тэнӧ лыддьӧны ловъяӧн, но тэ кулӧмыд.

Восьтӧм 3:10

Ме тшӧкті тэныд зумыда сулавны, и тэ видзин Менсьым тшӧктӧмӧс. Та вӧсна видза тэнӧ локтана сьӧкыд кадас. Тайӧ кадыс лоӧ став му пасьталаыс, медым тӧдмавны мувывса олысьясӧс.

Восьтӧм 3:15

Ме тӧда тэнсьыд уджъястӧ. Тэ абу пӧсь ни абу кӧдзыд. Мед эськӧ вӧлін пӧсь либӧ кӧдзыд!

Восьтӧм 3:7

«Филадельфия вичкоса анделлы тадзи гиж: Со мый висьталӧ Вежаыс да Збыльыс, код ордын Давидлӧн восьтаныс. Сійӧ восьтӧ, и некод оз вермы тупкыны. Сійӧ тупкӧ, и некод оз вермы восьтны. Сійӧ висьталӧ: