Петӧм 20:5 - Коми Библия 2023

⁵ Эн копрась да эн юрбит налы, ӧд Ме, Господь, тэнад Ен – вежӧгтысь Ен. Батьныслӧн мыж вӧсна Ме водзӧс перъя Менӧ мустӧмтысь челядьыслысь коймӧд да нёльӧд чужанвужйӧдз.

Петӧм 20:5 Kruisverwysings

Ӧксыяслӧн 2 небӧг 21:1

Давидлӧн ӧксыалан кадӧ куим во чӧж вӧлі тшыгъялӧм. Давид сэки шыасис Господь дінӧ. Господь шуис: «Тайӧ лои Саул да сылӧн рӧдвуж понда. Найӧ мыжаӧсь Гаваонын олысьяслысь вирсӧ кисьтӧмысь, ӧд найӧс Саул виис».

Ӧксыяслӧн 2 небӧг 21:6

Та вӧсна сет миянлы Саул рӧдысь сизим айуловӧс. Ми ӧшӧдам найӧс [лунъюгыднас] Господь водзын Гиваын, Господьӧн бӧрйӧм Сауллӧн карын». Давид вочавидзис: «Ме сета найӧс тіянлы».

Ӧксыяслӧн 3 небӧг 19:10

Илля вочавидзис: «Господьӧй, Тэ – Ен Саваоф. Ме век кесъялі тэныд став сьӧлӧмсянь. Израиль войтыр ӧтдортіс Тэнсьыд йитӧдтӧ, мый Тэ кӧрталін накӧд. Найӧ жуглісны Тэнсьыд висьпуктанінъястӧ, виалісны шыпуртӧн пророкъястӧ, ӧтнам ме ловйӧн коли. Ӧні корсьӧны вины тшӧтш менӧ».

Ӧксыяслӧн 3 небӧг 21:29

«Видзӧд, кутшӧма Ахав раммӧдчис Ме водзын. Раммӧдчӧмыс вӧсна сылӧн олан лунъяс дырйи Ме ог ысты шогсӧ. Но пиыслӧн олан лунъяс дырйи Ме ыста шогсӧ Ахавлӧн рӧдыс вылӧ».

Ӧксыяслӧн 4 небӧг 17:35

да кӧрталіс накӧд йитӧд. Сійӧ тшӧктіс: «Энӧ юрбитӧй мукӧд енъяслы, энӧ копрасьӧй да энӧ кесъялӧй налы, энӧ вайӧй налы висьяс.

Ӧксыяслӧн 4 небӧг 17:41

Найӧ юрбитісны Господьлы, но тшӧтш и асланыс идолъяслы. Весиг ӧнӧдз налӧн челядьыс да челядьныслӧн челядьыс кутчысьӧны батьясныслӧн оласногӧ.

Ӧксыяслӧн 4 небӧг 23:26

Но Господь эз кусӧд Ассьыс ыджыд скӧрлунсӧ. Господьлӧн скӧрлуныс ыпъяліс Иуда вылӧ, ӧд Манассей ёна дӧзмӧдіс Сійӧс.

Ӧксыяслӧн 4 небӧг 5:18

Но Господь мед прӧститас менӧ, тэнсьыд кесйӧгтӧ, мый ме копрася Риммон идоллы аслам ӧксыкӧд, кор сійӧ мунӧ юрбитанінӧ. Ӧд ӧксыӧс видзӧм могысь меным быть колӧ мунны сэтчӧ, и тшӧтш копрасьны сыкӧд. Мед Господь прӧститас менӧ таысь».

Ӧксыяслӧн 4 небӧг 5:27

Нееманлӧн проказаыс мед пыр кежлӧ вуджас тэ вылӧ да тэнад рӧд вылӧ». Гезий петіс Елисей ордысь. Сылӧн вир-яйыс вӧлі вевттьысьӧма лым кодь еджыд проказаӧн.

2 Каднебӧг 25:14

Эдомсаясӧс пасьвартӧм бӧрын гортас локтігӧн Амасей вайис аскӧдыс Сеир керӧсвыв муын олысьяслысь идолъяссӧ. Сійӧ пуктіс найӧс аслыс ен пыдди, юрбитіс налы да сотіс налы висьяс.

2 Каднебӧг 7:19

Но ті кӧ кежанныд Меысь да эновтанныд Менсьым индӧд-тшӧктӧмъясӧс, мый Ме сеті тіянлы, кутанныд кӧ кесъявны да юрбитны мукӧд енъяслы,

Иов 21:19

Тэ шуан, Енмыс пӧ мыждас лёк вӧчысьлысь ныв-писӧ. Но Енмыс мед мыждас лёк вӧчысьӧс асьсӧ, медым сійӧ та пыр велӧдчас.

Иов 5:4

Сылӧн ныв-пиыс олӧны полӧмӧн, найӧс мыждӧны карса дзиръя дорын, и дорйысьыс налы абу.

Псалтыр 79:8

Ен Саваоф, выльысь сувтӧд миянӧс! Сет миянлы аддзыны Тэнсьыд югыд чужӧмбантӧ, сэки ми мездмам.

Петӧм 23:24

Энӧ копрасьӧй-юрбитӧй налӧн енъяслы, энӧ олӧй на моз. Бырӧдӧй налысь енъяссӧ, жуглӧй налысь юрбитан изъяссӧ.

Петӧм 34:14

Господьысь ӧтдор мукӧд енъяслы энӧ копрасьӧй, ӧд Господь – вежӧгтысь Ен.

Шусьӧгъяс 8:36

Меным паныд мыж вӧчысь аслыс лёксӧ вӧчӧ, менӧ мустӧмтысь кулӧмсӧ радейтӧ».

Исай 44:15

Ломтас вылӧ сійӧ чукӧртӧ пу, сотӧ пусӧ, медым шонтысьны, пестӧ би да пӧжалӧ сы вылын нянь. Тайӧ жӧ пусьыс морт вӧчӧ енмӧс да юрбитӧ сылы, вӧчӧ бӧлбанӧс да копрасьӧ сылы.

Исай 44:19

Мортыс весиг оз мӧвпыштлы, сылӧн оз тырмы вежӧрыс, оз тырмы мывкыдлуныс, медым шуны: «Пу джынсӧ ме соті биын, биа ӧгыръяс вылын ме пӧжалі нянь, дасьті яй да сёйи сійӧс. А пуыслӧн колясысь ӧмӧй ме вӧча зывӧктор? Ме ӧмӧй понда юрбитны путорлы?»

Еремей 2:9

Та вӧсна Ме мыжала тіянӧс, – висьталӧ Господь, – мыжала тіянлысь челядьнытӧ да налысь челядьнысӧ.

Еремей 32:18

Сюрсъяслы Тэ петкӧдлан Ассьыд буралӧмтӧ, а батьяслӧн лёк вӧчӧмысь Тэ мынтысян налӧн ныв-пилы. Тэ – ыджыд да вына Ен, Тэнад нимыд – Господь Саваоф.

Езекиль 18:19

Ті юаланныд: ”Мыйла оз пиыс кывкут батьыслӧн мыж вӧсна?” Пиыс ӧд оліс веськыда да Менам индӧд-тшӧктӧмъяс серти. Та вӧсна сійӧ кутас овны.

Езекиль 18:2

«Израиль муын ветлӧ татшӧм шусьӧг: ”Батьяс сёйисны кисьмытӧм виноград, а челядьныслӧн пиньясыс ёнтӧны”. Мыйла ті тадзи шуанныд?

Езекиль 20:7

Ме тшӧкті налы, медым вештасны син водзсьыныс зывӧкторъяссӧ да дугдасны пежавны асьнысӧ египетса идолъясӧн, ӧд Ме – Господь, налӧн Ен.

Езекиль 39:25

Та вӧсна Господь Ыджыдыс тадзи висьталӧ: ӧні Ме бӧр вайӧда пленысь Яковлысь рӧдсӧ, бурсьӧлӧмтча став Израиль войтыр дінӧ. Ме вежӧгтысь Ен, Ассьым вежа нимӧс дорйысь.

Езекиль 8:3

Сійӧ нюжӧдіс ки сямаӧс да босьтіс менӧ юрсиӧд. Лов кыпӧдіс менӧ енэжа-муа костас да вайӧдіс Ерусалимӧ. Тайӧ вӧлі Енсянь петкӧдлӧм. Лов сувтӧдіс менӧ пытшкӧс йӧрлӧн войвывса дзиръя дорӧ, кӧні сулаліс Господьлысь вежӧгтӧмсӧ кыпӧдысь бӧлбан.

Даниил 1:2

Навукодоносор киӧ Господь сетіс иудаса Ехояким ӧксыӧс да Енлӧн крамысь дозмук-кӧлуй. Навукодоносор нуис тайӧ дозмук-кӧлуйсӧ Сеннар муӧ, аслас енлӧн крамӧ, да пуктіс найӧс крамса озырлун видзанінӧ.

Даниил 3:18

Но весиг кӧ оз мезды, тӧд, ӧксыӧй, мый ми огӧ кутӧй кесъявны тэнад енъяслы и огӧ копыртчылӧй тэӧн сувтӧдӧм зарни бӧлбанлы».

Левит 20:5

сэки тадзи вӧчысьлы да сылӧн рӧдвужлы Ме паныд сувта. Ме бырӧда войтыр пӧвстысь быдӧнӧс, коді кырсалысь ань моз сетчӧ Молок идоллы.

Левит 26:1

«Энӧ вӧчӧй бӧлбанъясӧс, энӧ сувтӧдӧй из сюръяяс да серпасалӧм изъяс, медым налы юрбитны. Ме – Господь, тіян Енныд.

Левит 26:29

Ныв-пиныдлысь яйсӧ ті сёйны кутанныд.

Наум 1:2

Господь – вежӧгтысь Ен, Сійӧ – водзӧс перйысь Ен. Господь водзӧс перйӧ, Сійӧ тырӧма скӧрлунӧн. Господь мынтысьӧ Сійӧс мустӧмтысьяслы, Сійӧ дугдывтӧг скӧралӧ паныд сувтысьяс вылӧ.

Лыд 14:18

”Ме, Господь – дыр терпитысь, буралысь [да эскана]. Ме прӧстита лёк вӧчӧм да мыж, но мыжаӧс ог коль мыждытӧг. Батьяслӧн мыж вӧсна Ме водзӧс перъя челядьныслысь коймӧд да нёльӧд чужанвужйӧдз”.

Лыд 14:33

Тіян пиянныд кутасны ыж-мӧс видзны овтӧминын нелямын во чӧж. Сыысь, мый ті эновтінныд Менӧ, налы ковмас нуны мыждӧмсӧ, кытчӧдз медбӧръяыс тіян пӧвстысь оз кув овтӧминын.

Лыд 25:11

«Пинес, Аарон поплӧн Элазар пиыслӧн пиыс, вештіс Израиль пиян вылысь Менсьым скӧрлунӧс. Ме пыдди сійӧ водзӧс перйис, медым вежӧгтігӧн Ме эг бырӧд Израиль войтырӧс.

Матвей 4:9

Сэсся шуис: «Ставсӧ тайӧс сета Тэныд, копыртчылан кӧ меным».

Иоан 15:18

«Муюгыдыс кӧ мустӧмтӧ тіянӧс, тӧдӧй, мый тіянысь водзджык на сійӧ мустӧмтіс Менӧ.

Иоан 7:7

Тіянӧс йӧзыс оз мустӧмтны, а Менӧ мустӧмтӧны, ӧд Ме висьтала, мый налӧн уджъясыс лёкӧсь.

Иоан 9:2

Велӧдчысьяс юалісны Исуслысь: «Велӧдысь, кодлӧн мыж вӧсна сійӧ синтӧмӧн чужӧма? Ачыс-ӧ сійӧ мыжа али бать-мамыс?»

Римӧ 1:30

Найӧ лёк сёрниаӧсь, удтысьӧны, Енсӧ мустӧмтӧны, мукӧдӧс дӧзмӧдӧны, асьнысӧ вылӧ пуктӧны да ошйысьӧны. Найӧ зільӧсь лёксӧ вӧчны, бать-мамныслысь оз кывзысьны,

Римӧ 8:7

Вир-яйсянь мӧвпалӧмыд эм Енлы паныд сувтӧм. Татшӧм мортыс оз сетчы Ен Индӧдлы, да и оз вермы.

1 Коринфӧ 10:22

Ми огӧ кӧсйӧй дӧзмӧдны Господьӧс, ми ӧд Сыысь абу вынаджыкӧсь.

Индӧд 32:21

Ылӧг енъяслы юрбитӧмнас найӧ кыпӧдісны Ме пытшкын вежӧгтӧм, идолъяснас дӧзмӧдісны Менӧ. Та вӧсна Ме кыпӧда на пытшкын вежӧгтӧм войтыр пыр, кодӧс оз позь шуны войтырӧн, дӧзмӧда найӧс вежӧртӧм войтыр пыр.

Индӧд 32:41

чардби моз сявкйысь шыпуртӧс Ме ёсьта, Аслам киӧн Ме мыжда, Меным паныд сувтысьяслысь водзӧс перъя, Менӧ мустӧмтысьяслы мынтыся.

Индӧд 4:24

Ӧд Господь, тіян Енныд, ставсӧ сотысь би. Сійӧ – вежӧгтысь Ен!

Индӧд 5:10

А налы, кодъяс радейтӧны Менӧ да олӧны Менам тшӧктӧмъяс серти, Ме петкӧдла Ассьым буралӧмӧс сюрс чужанвужйӧдз.

Индӧд 5:9

Эн копрась да эн юрбит налы, ӧд Ме, Господь, тэнад Ен – вежӧгтысь Ен. Батьныслӧн мыж вӧсна Ме водзӧс перъя Менӧ мустӧмтысь челядьыслысь коймӧд да нёльӧд чужанвужйӧдз.

Индӧд 6:15

медым тіян Господь Енлӧн скӧрлуныс оз ыпнит тіян вылӧ, да медым Енмыс оз бырӧд тіянӧс му вывсьыс. Ӧд Господь, тіян Енныд, коді олӧ тіян пӧвстын, вежӧгтысь Ен.

Индӧд 7:10

Но Сійӧ мынтысьӧ налы, кодъяс Сійӧс мустӧмтӧны, да тэрмасьӧ бырӧдны найӧс.

Яков 4:4

Гозъякост олӧм пежалысьяс, ті ӧмӧй онӧ тӧдӧй, мый мувывсакӧд ӧтувтчысь Енлы паныд сувтӧ? Сідзкӧ, коді кӧсйӧ ӧтувтчыны мувывсакӧд, сійӧ Енлы паныд сувтӧ.

Нав Исус 23:16

Ті кӧ торканныд асланыд Господь Енлысь йитӧдсӧ, мый Сійӧ кӧрталіс тіянкӧд, да кутанныд кесъявны-юрбитны мукӧд енъяслы, сэки Господьлӧн скӧрлуныс ӧзъяс тіян вылӧ, и регыдъя кадӧн ті быранныд тайӧ бур му вывсьыс, мый Господь сетіс тіянлы».

Нав Исус 23:7

Энӧ сорласьӧй тіян пӧвстын олысь войтыръяскӧд. Энӧ казьтывлӧй налӧн енъяслысь нимъяссӧ да энӧ сетӧй кывнытӧ на водзын, энӧ кесъялӧй да энӧ юрбитӧй налӧн енъяслы.

Нав Исус 24:19

Исус шуис войтырыслы: «Ті онӧ вермӧй кесъявны Господьлы, ӧд Сійӧ – вежа Ен, Сійӧ – вежӧгтысь Ен. Господь оз терпит тіянлысь лёк вӧчӧмъяснытӧ да мыжъяснытӧ.

Ёрдысьяс 2:19

Но ёрдысьлӧн кулӧм бӧрын войтырыс бара вӧчис лёксӧ батьяс дорысь унджык на. Найӧ юрбитісны-копрасисны мукӧд енъяслы да кесъялісны налы, эз эновтчыны асланыс лёк уджъясысь да эз дугдыны асныралӧмысь.