Осий 13:15 - Коми Библия 2023

¹⁵ Мед кӧ Ефрем аслас вокъяс пӧвстын вайӧ вотӧс, но петас асыв тӧв, овтӧминсянь пондас пӧльтны Господьлӧн тӧвнырыс, и Ефремлӧн юкмӧсыс кушмас, ва петаніныс косьмас. Сылысь озырлунсӧ петкӧдасны, став донаторсӧ мырддяласны.

Осий 13:15 Kruisverwysings

Олӧм 41:23

На бӧрся быдмисны омӧль, косьмӧм да асыв тӧлӧн кельдӧдӧм сизим шеп.

Олӧм 41:52

Мӧдыслы пуктіс Ефрем ним, ӧд шуис, Енмыс пӧ вӧчис менӧ вотӧса пуӧн тайӧ муас, кӧні ме сьӧкыдалі.

Олӧм 41:6

Быдмисны тшӧтш косьмӧм да асыв тӧлӧн кельдӧдӧм сизим шеп.

Олӧм 48:19

Но батьыс шуис сылы паныд: «Тӧда, пиӧй, тӧда. Сысянь тшӧтш чужас войтыр, и сійӧ лоас ыджыдӧн. Но ичӧтджык вокыс лоас ыджыдджык, и сысянь чужас унасьыс-уна войтыр».

Олӧм 49:22

Ӧсип – ю весьтын быдмысь вотӧса пулӧн вож, быдмӧ-кыпӧдчӧ стен пӧлӧн.

Иов 18:16

Сылӧн вужйыс косьмас улісяньыс, а вожъясыс – вылісяньыс.

Псалтыр 1:4

Но лёк вӧчысьяслӧн оз ло тадзи. Найӧ лоӧны [му вылысь] тӧвнырӧн нӧбӧдан кыд кодьӧсь.

Исай 14:21

Батьныслӧн мыж вӧсна дасьтӧй вианін сылӧн пиянлы, медым найӧ эз босьтны асланыс кипод улӧ мусӧ, эз тыртны муюгыдсӧ лёксьысьясӧн.

Исай 17:13

Войтыръяс горзӧны, быттьӧ пыдӧстӧм ваяс бузгӧны. Но Господь чирыштас найӧс, и найӧ ылӧдз пышъясны. Найӧ тӧвзясны керӧсъяс вывті тӧвнырӧн нӧбӧдан кыд моз, ыджыд тӧвнырӧн нӧбӧдан бус моз.

Исай 27:8

Кор Тэ ӧтдортлін Израиль войтырӧс, Тэ чирыштлін найӧс этш тӧдӧмӧн. Асыв тӧв моз Тэ вӧтлін найӧс Аслад вына пӧльыштӧмнад.

Исай 41:16

Тэ кутан шердйыны найӧс, а тӧлыс нӧбӧдас, тӧвнырыс разӧдас найӧс. Тэ кутан нимкодясьны Господьӧн, кутан ошйысьны Израильлӧн вежа Енмӧн.

Еремей 20:5

Тайӧ карыслысь озырлунсӧ да эмбурсӧ – ставсӧ, мый могысь тані олысьяс уджалісны, тшӧтш иудаса ӧксыяслысь став донаторсӧ Ме сета вӧрӧг киӧ. Вӧрӧг ставсӧ куштас-мырддялас да нуас аскӧдыс Вавилонӧ.

Еремей 4:11

Сійӧ кадас тайӧ войтырыслы да Ерусалимын олысьяслы лоӧ висьталӧма: «Овтӧминса керӧсъяс вывсянь сотысь тӧвныр пондас пӧльтны Менам войтыр вылӧ. Татшӧм тӧвныр дырйи он вермы тӧлӧдны-весавны шобді тусь.

Еремей 4:12

Татшӧм ён тӧвныр локтас Менам кӧсйӧм серти, кор Ме понда мыждыны тайӧ войтырсӧ.

Еремей 51:1

Господь тадзи висьталӧ: – Ме кыпӧда бырӧдан тӧвныр Вавилон да сэні олысьяс вылӧ, Меным паныд сувтысьяс вылӧ.

Еремей 51:36

Та вӧсна Господь тадзи висьталӧ: – Ерусалимын олысьяс, Ме доръя тіянӧс, водзӧс перъя тіян вӧсна, Ме косьта вавилонсаяслысь юяссӧ, косьта налысь ва петанінъяссӧ.

Езекиль 17:10

Сійӧ вужъясьӧма да быдмӧ. Но мый лоас сыкӧд? Асыв тӧв петас да косьтас сійӧс. Кӧні быдмис, сэні и косьмас».

Езекиль 19:12

Но сійӧс лёкысь нетшыштісны, шыбитісны муӧ, и асыв тӧв косьтіс сылысь вотӧссӧ. Чегъялӧм ён вожъясыс косьмисны, найӧс би ньылыштіс.

Даниил 11:8

Налысь енъяссӧ, бӧлбанъяссӧ да эзысь-зарниысь вӧчӧм дона дозмук-кӧлуйсӧ сійӧ босьтас аскӧдыс да нуас Египетӧ. Та бӧрын некымын во чӧж сійӧ оз петавлы тышӧ войвывса ӧксылы паныд.

Осий 10:1

– Израиль вӧлі уна вожа виноград пу кодь, сійӧ вайис уна вотӧс. Кымын унджык сылӧн вӧлі вотӧсыс, сымын унджык сійӧ лэптіс висьпуктанінъяс. Кымын бурджыка сылӧн муыс быдтіс нянь, сымын ёнджыка сійӧ мичмӧдіс юрбитан изъяс.

Осий 2:3

Оз кӧ, Ме сійӧс кушӧдз пӧрччӧда, пузчужӧм кагаӧс моз пасьтӧгыс коля. Ме вӧча сійӧс овтӧминӧн, вӧча сійӧс кос муӧн, горш косьмӧмысла сійӧ кулас.

Осий 4:19

Ыджыд тӧвныр чышкыштас найӧс, асланыс вись вайӧмысь налы яндзим лоӧ.

Осий 9:11

Ефремлӧн [рӧдмӧмнас] нималӧмыс жбырмунас лэбач моз: чужтӧмыс, нӧбасьӧмыс, сьӧктӧмыс оз нин ло.

Иона 4:8

А кор петіс шонді, Ен ыстіс чизыр асыв тӧв. Шонді пӧжис Ионалысь юрсӧ. Сійӧ дзикӧдз лёшмуніс да виччысис кулӧм. Иона шуаліс: «Бурджык меным кувны олӧм дорысь».

Наум 2:9

Куштӧй сылысь эзысь-зарнисӧ! Сылӧн озырлуныс лыдтӧм-тшӧттӧм, весиг лыддьынысӧ он вермы.

Индӧд 33:17

Ӧсиплӧн выныс медводдза чужысь ӧшлӧн кодь, сылӧн сюръясыс вӧлявывса ӧшлӧн кодьӧсь, наӧн люкалӧ войтыръясӧс, вӧтлӧ найӧс му помӧдзыс. Татшӧмӧсь Ефрем чужанкотырлӧн лыдтӧм-тшӧттӧм йӧзыс, Манассей чужанкотырлӧн уна сюрс йӧзыс.