Ездра 1:3 - Коми Библия 2023

³ Быдӧн Сылӧн войтырысь мед мунас Иуда муӧ Ерусалимӧ. Енмыс мед лоас быдӧнкӧд! Лэптӧй сэні крам Господьлы, Израильлӧн Енлы. Сійӧ – Ен, кодлӧн оланіныс Ерусалимын.

Ездра 1:3 Kruisverwysings

Ӧксыяслӧн 3 небӧг 18:39

Кор йӧзыс аддзисны тайӧс, кымынь уськӧдчисны муас да шуисны: «Господь эм Ен! Господь эм Ен!»

Ӧксыяслӧн 3 небӧг 8:23

да шуис: «Господьӧй, Израильлӧн Енмӧй! Тэ кодь мӧд енмыс абу енэжас ни му вылас! Тэ видзан кӧрталӧм йитӧдтӧ да буралӧмтӧ Аслад кесйӧгъясыд дінӧ, кодъяс став сьӧлӧмсяньыс олӧны Тэнад кӧсйӧм серти.

1 Каднебӧг 28:20

Давид шуис аслас Соломон пиыслы: «Ло зумыд да повтӧм, босьтчы уджӧ! Эн пов, эн майшась, ӧд Господь Ен, менам Енмӧй, тэкӧд. Сійӧ оз коль, оз эновт тэнӧ, но отсалас помавны Господьлысь крам вӧчан уджъяссӧ.

Ездра 1:4

Быдлаын, кӧні олӧ тайӧ коляс войтырыс, сэтчӧс олысьяс мед отсасясны тайӧ войтырыслы. Ерусалимын Енлысь крам лэптӧм вылӧ мед сетасны эзысь-зарни, эмбур, ыж-мӧс да ас кӧсйӧм серти козинъяс».

Ездра 4:3

Зоровавель, Исус да израильса мукӧд рӧдкутысьяс вочавидзисны: «Миянкӧд тшӧтш ті онӧ кутӧй лэптыны миян Енлы крамсӧ. Ми асьным лэптам сійӧс Господьлы, Израильӧн Енлы, кыдзи тшӧктіс миянлы персияса Кир ӧксы».

Ездра 5:13

Но кор Вавилонын ӧксыӧ пуксис Кир, сійӧ аслас медводдза веськӧдлан воӧ тшӧктіс лэптыны Енлысь крамсӧ.

Ездра 5:3

Крам лэптысьяс дінӧ локтісны Авар-Нахара муын юралысь Таттенай, Шетар-Бозенай да налӧн уджъёртъясыс. Найӧ юалісны: «Коді лэдзис тіянлы лэптыны тайӧ крамсӧ да водзӧ уджавны тані?»

Ездра 6:7

Лэдзӧй вӧчны Енлысь крамсӧ. Мед иудейяслӧн юралысьыс да юрнуӧдысьяс водзӧ лэптасны Енлысь крамсӧ важ местаас.

Исай 37:16

«Господь Саваоф, Израильлӧн Ен! Тэ пукалан херувимъяс вылын. Тэ – ӧти Ен, Тэ ыджыдалан став му пасьталаыс. Тэ вӧчин енэжсӧ и мусӧ.

Исай 44:28

Кирлы Ме шуа, мый сійӧ – Менсьым войтырӧс видзысь, сійӧ ставсӧ вӧчас Менам кӧсйӧм серти. Сійӧ шуас Ерусалимлы, тэнӧ пӧ выльысь лоӧ лэптӧма, а крамлы шуас, тэнсьыд подувтӧ пӧ выльысь лоӧ пуктӧма.

Исай 45:5

Ме – Господь, и мӧдыс абу, Ме кындзи мӧд Енмыс абу! Тэ он тӧд Менӧ, но Ме сета тэныд вын,

Еремей 10:10

Сӧмын Господь эм збыль Енмыс, Сійӧ – ловъя Ен, помтӧг олысь Ӧксы. Сылӧн скӧралӧмысь муыс сыркакылӧ, Сылӧн ярлун водзын войтыръяс вынтӧмӧсь.

Даниил 2:47

Ӧксы шуис Данииллы: «Збыльысь, тіян Енныд – енъяслӧн Ен да ӧксыяслӧн Ыджыдыс. Сійӧ – гусятор Восьтысь, ӧд тэ вермин восьтны тайӧ гусяторсӧ».

Даниил 6:26

Ме тшӧкта, мый быдлаын менам юраланінын мед поласны-тіраласны Данииллӧн Енмысь. Сійӧ – Ловъя Ен, помтӧг олысь Ен, Сылӧн юралӧмыс зумыд, Сылӧн ыджыдалӧмыс помасьлытӧм.

Матвей 28:20

Велӧдӧй найӧс овны став Менам тшӧктӧм серти. Тӧдӧй: Ме пыр тіянкӧд нэмъяс помасьтӧдз». Аминь.

Ап. уджъяс 10:36

Сійӧ мӧдӧдіс Израиль войтырлы Ассьыс кывсӧ, лӧньлун йылысь Бур Юӧрсӧ, кодӧс вайис Исус Кристос. Сійӧ ставныслы Господь.

Индӧд 32:31

Вӧрӧглӧн дорйысьыс абу миян Дорйысь кодь, тайӧс гӧгӧрвоӧ весиг вӧрӧгным.

Нав Исус 1:9

Ме тшӧкта тэныд: ло зумыд да повтӧм! Эн тірав да эн пов, ӧд Господь, тэнад Енмыд, лоӧ тэкӧд быдлаын, кытчӧ тэ мунан».