Roma 12:3 - Surat Ralan na'a Vaidida

³ Ubu nala roak Ni rala lolin a verin yaꞌa, ba nala varvara ma ufamalik Ni vaivatul ra verin mia. Ba usurak mia munuk ma deka fyakaratat tenabira ra ma fyikir ne, afa ovi rnaꞌa tenabira ra, nlia tali afa ovi kena ra. Naꞌuk velik aba, msyiꞌik tenabira ra veki ma wean lahir lingaꞌan i kena, ovu wean yabi i Ubu nala roak verin mia, tevek bira inorang a verin Ia.

Roma 12:3 Kruisverwysings

Lukas 18:11

Tamata Farisi yai ndiri ma naflurut watan naꞌa ralan a ne, ‘Ubu, yaꞌa ufalak fara weninyai verin Oa, tevek yaꞌa wol weang tamata liak ra; ira rwi-rwa tamata ra ma rbori rira metan ra, rangal inukun ra, rsifa roak naꞌuk rtuba ovu tamata ovi wol awarira verin ira, ovu vali wol weang tamata i baꞌi nera babahir kulu ini.

Yohanes 3:34

Ubu nsinir Ia ma nfamalik Ni vaivatul ra, tevek nfangora lahir Ia ovu Ni Roh a.

Roma 1:5

Tali Yesus Kristus, na Ubu nala roak Ni rala lolin a verin yaꞌa, ma nfili yaꞌa ma eluk rasul, ma air tamata ra munuk, boma rorang Kristus ma rsoak verin Ia, ovu vali rfadawang naran a.

Roma 11:20

Inyai kena urun. Ubu nalaꞌing ira, tevek wol rorang Kristus, ovu nala mia ma mnyaꞌa warira ra, tevek bira inorang a. Ba deka fyakaratat tenabira ra, naꞌuk msyiꞌik wabira ma lolin, boma deka mifla talik bira inorang a, ma wol myorang roak Ubu.

Roma 11:25

Terang a valing averi! Era ma deka fyikir ne, mkyaꞌa munuk afakataka, tevek inak ma mkyaꞌa afa fanfonak i Ubu ralan a nfalak ini. Tamata Israel boku ralarira rangrebat ma rafena rorang Ubu. Afa ini veka nbana, nata ti naran amar i Ubu nfadoku roak. Ia notu ma tamata ovi wol Yahudi, naꞌuk nfili roak ira ma rira vavaꞌat kakiwal, rma munuk ma rorang Ia.

Roma 12:16

Era verin mia munuk ma mian vai isa naꞌa bira fikiran ra, boma bira vavaꞌat ra lolin ovu tamata liak ra. Deka fyakaratat tenabira ra, naꞌuk mtyorung ma myotu bira kida ovu tamata biasa ra watan. Deka fyikir ne, bira kakaꞌa a dawan lia tamata liak ra.

1 Korintus 15:10

Naꞌuk Ubu nala roak Ni rala lolin a verin yaꞌa, bi fiang ini eluk rasul, ovu Ni rala lolin yai wol nleka ma lolan watan. Naꞌuk ukarya urun ia ma nlia tali rasul liak ra. Velik aba, yaꞌa wol ot-nala munuk afa avyai, naꞌuk Duilaꞌa nfatuang yaꞌa, bi bisma ufabana nala karya yai.

1 Korintus 3:10

Ubu nala yabi verin yaꞌa ma ufamalik lan Yesus Kristus verin mia. Ning karya yai wean tamata i ni kakaꞌa dawan ma notu rahan, na nfadoku lan fanderen a. Tamata ovi rair mia, ira wearira tamata ovi rfadiri rahan naꞌa fanderen i otu roak yai ratan a. Naꞌuk tamata ovi rfadiri rahan yai lokat ira musti rsiꞌik ma lolin rira karya ra naꞌa fanderen yai.

1 Korintus 7:17

Terang a valing averi! Era ma lokat tamata bira vavaꞌat musti wean lahir afa ovi Duilaꞌa nfadoku roak verin mia, naꞌut i nera mia ma myorang Ia. Ufadoku roak ma afa i ufalak ini neluk fareta verin sidovung tamata ovi rorang Yesus munuk.

2 Korintus 10:13

Ami wol amotu wean inyai. Ami amafena ma amfadawang tenamami ra ma nlia tali afa ovi Ubu nfadoku ra. Naꞌuk amfamalik watan naꞌa karya i Ubu nfadoku roak verin ami. Mia ini mnyaꞌa vali wan ovi amkarya naꞌa.

2 Korintus 12:13

Afaka ma wol otu verin mia obin, wean afa ovi otu roak verin tamata ovi rorang Yesus rira sidovung naꞌa wan liak? Teran aꞌuk i wol otu varvara verin mia ma myala kubang verin yaꞌa, ba era ma myabun yaꞌa naꞌa ning sala i otu yai!

2 Korintus 12:7

Kena urun ma afa ovi Ubu nfaturu roak verin yaꞌa dawan urun, ma tamata ra wol rfikir aran afa ovi nfaturu ra. Naꞌuk Ubu notu ma deka ufakaratat tenang a, ba nala lahir afa isa wean suhut naꞌa tenang a. Afa yai wean lahir nitdawan ni sansinir a ma nwi-nwa lalawatan yaꞌa.

Galatia 6:3

Wean i tamata isa nfikir ne, ia veran rahi tamata liak ra, naꞌuk velik aba wahal, na inyai nfaturu lahir ne, ia kaꞌi nlabir watan tenan a.

Efesus 3:2

Ufikir ne, mia kaꞌi mryenar roak naꞌa Ubu Ni rala lolin a, bi nala karya ini verin yaꞌa ma ufalyawang Ni Ivar Lolin a verin mia, ma nlobang mia.

Efesus 3:4

Wean i byas roak, na veka mkyaꞌa lahir ne, yaꞌa ufan-aran afa ovi Ubu notu verin tamata ovi wol Yahudi ra, naꞌa Kristus.

Efesus 4:16

Kristus notu ma ita tamata ovi torang Yesus wead isa watan, wean afa ovi rnaꞌa munuk tenadida ra rnaꞌa isa, ma isa nlobang isa. Ba wean i tsilobang ita, ovu itmunuk tkarya urun naꞌa Ni vaꞌi ralan a ovu dida yabi ovi Duilaꞌa nala roak verin ita, na dida inorang naꞌa Duilaꞌa veka nmela ovu ntafal ma nangrebat.

Filipi 2:13

Myotu wean inyai, tevek Ubu nkarya naꞌa ralabira ra, boma inabira ma myotu afa ovi rfaloling Ubu ralan a, ovu Ia nlobang mia ma myot-nala afa avyai.

Kolose 1:29

Wean inyai, bi ukarya urun, tevek Kristus Ni ngrebat nlobang yaꞌa ma afa ovi otu ra lyawan roak.

Kolose 2:13

Lan ana, naꞌut i wol myorang Kristus obin, na bira vavaꞌat ra wean watan i myata roak, tevek bira salasilan ra, ovu ngrebat i notu ma tamata ra rotu watan afa ovi rira ininan sian a nfalak ra, ovu vali wol rsunat mia obin wean tamata Yahudi ra rotu. Naꞌuk fiang ini, Ubu nala vavaꞌat ngorvaꞌan roak verin mia ovu Kristus. Ia naꞌi vatuk roak bira salasilan ra munuk.

1 Timotius 1:14

Duilaꞌa nala Ni rala lolin verin yaꞌa ma nfangora ralang a, ba orang Ia ovu ulobang tamata liak ra vali. Wean vali inyai verin tamata ovi rorang Kristus Yesus.

1 Timotius 2:15

Velik ne wean inyai, naꞌuk Ubu veka nsikat vata ra tali rira salasilan ra, ma rira vavaꞌat kakiwal naꞌa amar i rarali yanarira ra. Ia notu wean inyai, asal ne rorang lalawatan Yesus ovu rlobang tamata ra, ovu rira vavaꞌat ra rmalola, ovu vali ma rtahang nal ralarira ra naꞌa afaka watan.

1 Timotius 2:9

Ufalak vali ma wean i vata ra rung a reluk ira, na reluk kadaravit ovi inovan verin vata ra, boma rfaturu ne, rira vavaꞌat lolin. Deka rtebung rira vut ra ma nlia daꞌin. Deka reluk kadaravit ovi fyawar urun, te rfakloꞌi masa te mutiara naꞌa tenarira ra.

Titus 2:12

Ubu nair ita ovu Ni rala lolin a, ma deka totu afa ovi wol inan ra, ovu deka torang afa sian ovi rnaꞌa lanit ivavan ini. Ni rala lolin notu ma tatahang nal ralad ra naꞌa afaka watan, ovu torang urun Ia, ovu vali dida vavaꞌat ra rmalola.

Titus 2:2

Oa musti msurak brana ovi tuvu roak ira, boma rkaꞌa ma rsiꞌik ma lolin rira vavaꞌat ra. Ira musti rkaꞌa warira vali, boma tamata ra ralang ira, ovu musti rira fikiran ra blawat. Ira musti ralarira urun ma rorang Ubu Ni vaivatul ra, ovu vali ralar lolin ma rlobang tamata ra. Ira musti rtahang nal ralarira ra naꞌa afaka watan, boma rira inorang nangrebat.

Titus 2:4

Itvata ra rotu wean inyai, boma rair vata tuvmarmuri ra ma rkaꞌa ma rlobang awarira ra ovu yanarira ra,

Titus 2:6

Msurak vali brana tuvmarmuri ra wean inyai, boma rtahang nal ralarira naꞌa afaka watan.

Yakobus 4:6

Ubu nala Ni rala lolin verin ita, boma tfalek-nala afa sian ovi rnaꞌa raladida ra. Wean i nfalak roak naꞌa Surat Ralan a ne, “Ubu nangal tamata ovi rfakaratat tenarira ra, naꞌuk nlobang ovu nala ngrebat verin tamata ovi baꞌi rfakabava tenarira ra.”

1 Petrus 1:13

Ba wean inyai, bi misusan bira fikiran ra ovu msyiꞌik wabira ma lolin, boma myot-orang munuk afa ovi Ubu ralan nfalak a. Fyakloꞌi aꞌuk bira vavaꞌat ra verin Ubu, tevek myorang urun ne, Ia veka naflahar mia naꞌut i Yesus Kristus veka nma ewal.

1 Petrus 4:11

Wean i tamata isa ni yabi ma nfamalik Ubu Ni vaivatul ra verin tamata liak, na afa ovi nfalak ra musti norang watan Ubu Ni vaivatul ra. Wean i tamata iki watan ni yabi ma nlobang tamata liak, na musti nlobang ovu ngrebat i Ubu nala verin ia. Myotu wean inyai, na tamata ra munuk veka rfadawang Ubu nahu Yesus Kristus. Ubu Ni ngrebat dawan ilaꞌa ovu inovan ma tfadawang Ia, nata ti wol ni wahan! Kena urun.

1 Petrus 4:7

Terang a valing averi, lanit ivavan sarseri mane namwear roak, ba misusan wabira ovu bira fikiran ra, ovu vali mtyahang nal ralabira naꞌa afaka watan, boma bisma miflurut lalawatan.

1 Petrus 5:5

Wean vali inyai verin tuvmarmuri ra. Mryenar ma myot-orang snurak tali tamata ovi rira tuvu nrahi mia. Terang a valing tamata inorang ra munuk: fyakabava tenabira ra ma isa nalang isa, tevek rtulis roak naꞌa Surat Ralan wean ini, “Ubu nangal lahir tamata ovi rfakaratat tenarira ra, naꞌuk nala Ni kalolin a verin tamata ovi rfakabava tenarira ra.”

1 Petrus 5:8

Msyiꞌik wabira ma lolin, tevek nitdawan ni sian mia. Ia wean singa i vain dawan ma nbana tia ma watan ala ndava fanaꞌan.

3 Yohanes 1:9

Yaꞌa ala roak surat verin tamata ovi rorang Yesus rira sidovung a naꞌa inyai, naꞌuk Diotrefes nafena ma not-orang afa ovi ufalak ra, tevek inan ma nsiꞌik watan ni kadera a, boma nban-ulu verin sidovung yai.