Kisah 2:39 - Surat Ralan na'a Vaidida

³⁹ Ubilaꞌa i traning a nala tnorung ini verin tamata ovi nfili ra, ba nala verin mia ovu yanabira ovu ububira ra, ovu vali verin tamata ovi raroa tali ini.”

Kisah 2:39 Kruisverwysings

Kisah 10:45

Tamata Yahudi ovi rorang Yesus ma irmunuk Petrus rtali Yope rma yai rtalkaka, tevek Ubu nala Ni Roh verin tamata ovi wol Yahudi ra vali.

Kisah 14:27

Ti ma raran Antiokhia, na rasweang sidovung tamata ovi rorang Yesus ma rasdovu ira, beti rfamalik munuk Ubu Ni afa ovi notu roak verin ira naꞌa rira karya ra. Ira rfamalik vali ne, wean inba ma Ubu nala Ni lingaꞌan lolin verin ira, boma tamata ovi wol Yahudi ra rorang vali Yesus.

Kisah 15:14

Simon Petrus nfamalik roak ne, lalan ana Ubu nfaturu Ni rala lolin verin tamata ovi wol Yahudi ra, ma nfili boku tali ira ma reluk Ni tamata ra.

Kisah 15:3

Ba tamata ovi rorang Yesus naꞌa Antiokhia rfatuang ira rti kota murin a, beti rbana rti propinsi Fenisia ovu propinsi Samaria ma rfamalik naꞌa tamata ovi wol Yahudi ira naꞌuk rorang Yesus. Tamata ovi rorang Yesus naꞌa inyai rarenar ivar yai, na inar lolin.

Kisah 15:8

Ubu nkaꞌa munuk lahir tamata ralarira ra. Ia nfaturu roak ne, nfili ira ma nala Ni Roh verin ira wean i notu roak verin ita.

Roma 11:29

tevek Ubu wol nkati Ni tnorung a verin tamata ovi nfili ovu naflahar roak ira.

Roma 8:30

Ba Ubu nfili tamata ovi ralan a nfalak roak ma nera lan ira ma reluk yanan ra. Ubu nala lingaꞌan verin tamata avyai ma rira vavaꞌat ra rmalola. Nata Ia veka nalang vali ira ovu notu ma rira vavaꞌat ra lolin urun naꞌa vanan i nfitik nyadat a.

Roma 9:24

Ubu nera roak ita ma teluk Ni tamata ra. Ia wol mane nera watan tamata ovi rtali Yahudi ra, naꞌuk nera vali tamata ovi wol Yahudi ra.

Roma 9:4

Ira tamata Israel ira. Ubu nfili roak ira, ma nala ira ma reluk yanan ra, ovu nfaturu lahir Ni ngrebat verin ira. Ia notu tnorung ra verin ira, ovu nala Musa ni inukun ra verin ira. Ubu nfaturu vali verin ira ne, wean inba ma raraning Ia ovu nala roak Ni tnorung ra verin ira.

1 Korintus 7:14

Brana i norang roak Duilaꞌa Yesus, naꞌuk awan a wol norang, na Ubu notu ma awan ralan a ntafal ma lolin tevek ni vavaꞌat isa ovu brana a, ovu brana yai ni inorang. Vata i norang roak Duilaꞌa Yesus, naꞌuk awan a wol norang, na Ubu notu ma awan ralan a ntafal ma lolin tevek ni vavaꞌat isa ovu vata a, ovu vata yai ni inorang a. Ubu notu vali wean inyai verin yanabira ra. Wol wean inyai, na yanabira ra wearira lahir kasikoꞌu ovi wol rorang Ubu.

Efesus 1:18

Era vali ma fara Ubu notu ma bira fikiran ra lyawan, boma fyan-aran afa lolin ovi mnyaban ma myala tali Ia, tevek ralan nfalak roak ma veka nala verin mia. Ia notu wean inyai, tevek nera mia ma myeluk Ni tamata ra. Era vali ma mkyaꞌa afa lolin urun ovi Ubu nfadoku roak ma al naflahar Ni tamata ovi rorang Ia.

Efesus 2:12

Naꞌut inyai, na mia wol bira vavaꞌat isa ovu Kristus, ovu wol mkyaꞌa Ia. Mia wol tamata Israel mia, ovu vali tamata dakan mia, ba wol myala tnorung i Ubu notu roak verin Abraham ovu ubun-nusin ra. Lan ana, mnyaꞌa lanit ivavan ini, naꞌuk wol fyikir aran ma myala afa lolin isa vali naꞌa amar ovi veka rma ini, ovu wol mkyaꞌa Ubu.

Efesus 4:4

Ubu Ni Roh ikisa watan, ovu Ia nkeak roak mia ma mnyaꞌa sidovung isa watan. Itmunuk takloꞌi dida vavaꞌat ra naꞌa afa lolin ovi Ubu veka notu verin ita, tevek Ia nera ita ma teluk yanan ra.

2 Tesalonika 1:11

Wean inyai bi, amaflurut lalawatan verin mia. Amera verin Ubu ma fara notu ma bira vavaꞌat ra inovan ovu afa ovi ralan nfalak a, wean i nera ovu nfili roak mia. Amera vali verin Ia ma nlobang mia ovu Ni ngrebat a, boma myot-nala afa ovi lolin ra, tevek myorang Yesus Kristus.

2 Timotius 1:9

Ubu nsikat ita tali dida salasilan ra, ovu nera ita ma raladida ra rmerat urun. Afa lolin ovi totu ra wol rala vavaꞌat kakiwal verin ita. Naꞌuk Ubu kaꞌi nala vavaꞌat kakiwal verin ita, tevek Ni rala lolin verin ita, ovu norang lahir afa ovi ralan nfalak ra. Ubu wol notu lanit ivavan obin, na nfadoku roak ne, veka nala Kristus Yesus ma al ntevut ita.

Ibrani 3:1

Ba terang a valing ovi myorang Ubu, bira vavaꞌat ra rmalola, ovu Ubu nfili roak mia ma veka ti mnyaꞌa lanit ratan. Fara minovak ma lolin naꞌa Yesus. Ita torang ne, Ia neluk Ubu Ni rasul, ovu neluk Mela Falurut Ilaꞌa verin ita.

Ibrani 9:15

Ba Kristus neluk leta verin ita naꞌa Ubu Ni tnorung ngorvaꞌan yai, boma tamata ovi Ubu nera roak ira, bisma rira munuk kalolin ovi Ubu nfadoku roak naꞌa Ni tnorung a. Kalolin avyai rnaꞌa, nata ti wol ni wahan. Kristus nmata ma ntevut ira tali rira salasilan ovi rotu ma rangal Ubu Ni tnorung mnanat i nala verin Musa.

1 Petrus 5:10

Susa i mtyuan yai veka wol kaꞌi mnanat. Ti ma susa yai roak rok, na Ubu veka nala Ni rala lolin i dawan urun ma nfakena munuk afa ovi wol rnaꞌa bira vavaꞌat ra. Ia vali veka nfabatar ovu nfangrebat ewal bira inorang a, ovu vali notu ma mtyahang nal ralabira, ba mdyiri watan naꞌa bira inorang. Ia nera roak mia ma myovu naꞌa vanan i nfitik a nyadat ma wol ni wahan a. Notu munuk afa avyai, tevek dida vavaꞌat isa roak ovu Kristus.

2 Petrus 1:10

Wean inyai, bi terang a valing averi, era ma ralabira urun ma myotu aꞌuk afa ovi lolin ra, boma fyaturu ne, Ubu nera roak mia ovu nfili roak mia. Wean i bira vavaꞌat ra wean inyai, na mia wol mlyeka roak tali bira inorang verin Kristus.

2 Petrus 1:3

Ubu kaꞌi nala Ni ngrebat verin ita, tamata ovi torang Ia. Ia nfakena afakataka munuk ma al torang urun afa ovi nfalak ra ovu dida vavaꞌat ra totu ma Ubu ralan a lolin. Ubu notu wean inyai, tevek tkaꞌa Ia. Ia nera roak ita ma teluk Ni tamata ovi torang Ia, tevek Ni dawan a ovu Ni rala lolin a.

Wahyu 17:14

Ira veka rotu rihi ovu Domba Yanan a, naꞌuk Domba Yanan veka nfaleka ira, tevek Duilaꞌa Ia verin dua ra munuk, ovu Ia neluk Raja verin raja ra munuk. Ia ovu Ni tamata ovi rorang Ia yai veka uturira. Ni tamata avyai, Ubu nfili roak ira, ovu nera ira, tevek rot-orang lalawatan afa ovi Ia nfalak ra.”

Wahyu 19:9

Ubu Ni sansinir tali lanit ratan yai nfalak ewal vali verin yaꞌa ne, “Mtulis wean ini: Ubu naflahar tamata ovi rasweang ira ma rovu naꞌa Domba Yanan Ni snobsifa.” Ia ntafal vali ma nfalak ne, “Vaivatul ovi kena urun, tevek rtali Ubu.”