Loma 12:2 - Loina Tabu Auwauna NT

² Ta geya'abo bubuna bale'u 'ediya watagwatagwalemi, ta esi oomi maibo'ana wada tagwaledi Yaubada 'enaya, be 'enega Yaubada 'imi nuwanuwao 'ida gieauwaudi, be tauna 'ina nuwena bobo'adi, be gwaugwausowalidi, ta palupaludi wada mwalatonidi.

Loma 12:2 Kruisverwysings

Madiu 13:22

“Ta atu nidi kwakwakwala 'ediya sibe'uya taudi tetela bobo'ana sinonona, ta 'idi nuwanuwa bale'u be esaesa 'ana nuwanuwao 'ediyega tetela bobo'ana siloemwawasina, 'enega nigeya sawesawenaya be siuuwa.

Maki 4:19

ta esaesa be bale'u 'ina yageyao 'adi nuwanuwa 'ediyega Yaubada 'ina ona sinuwa pupulena, 'enega nigeya sawesawenaya be siuuwa.

Yoni 14:30

“Nai geya'abo tuta dudulana yaonaona 'emiya, manuna ni'atu gabula 'ana 'inapwana to'umalina 'imeema, ta tauna nigeya 'ebweu wate 'ina waiwai 'eguya,

Yoni 15:19

Ta 'abo 'omi 'imi bubuna me bale'u nadigega, me bale'u sida obobomemi, manuna 'omi gosediyao. Ta bale'u gete 'enega 'omi ni'atu ya'au'ewa apwesemi, 'enega nigeya wate me bale'u 'idi boda 'ena wamiyami. Nate 'enega me bale'u siguitoyasemi.

Yoni 17:14

Ta tomota nidi 'imu ona ni'atu ya'ebwa'edi, ta esi me bale'u sietalauwaledi, manuna taudi nigeya me bale'u 'idi boda 'ena simiyami, tuga nadigega 'abo'agu wate nigeya 'idi boda 'ena yamiyami.

Yoni 7:7

manuna 'omi geya'abo me bale'u sietaetalauwalemi, ta 'abo'agu esi sietalauwalegu manuna 'idi bubuna to'umalina yasimasimanedi.

Loma 12:1

Tasigwao, wada nuwa'i'isi 'aene Yaubada 'ina 'atenuwa'ole'ole 'edaya sinabwa wawasae, 'enega gete 'igu loguguya 'emiya be 'aene tuta mayawasimi wada taliyaemi Yaubada 'enaya, manuna Yaubada nuwanuwana be oomi maibo'ana wada tagwaledi 'ina guinuwa 'enaya. Gete tapwalolo 'ai'aila Yaubada matanaya 'abo nadigega waguinuwa'esa.

Loma 13:14

Ta esi 'ilobweneda be 'ida 'Inapwana Yesu Keliso 'ina bubunega tada bubuna, be geya'abo bubuna bale'u manuna tanuwanuwa.

Loma 7:12

Ta loina nina tamwalatonina 'aene 'esasena, ta wate 'etobodao maibo'adi 'esasedi ta palupaludi, ta wate maibo'adi bobo'adi.

Loma 7:14

Mosese 'ina loina nina ni'atu tamwalatonina 'aene Yaubada Yaluyaluwana 'enega 'imai, ta esi 'abo'agu 'igu bubuna bale'u, 'enega yaetoguinuwa to'umalina 'enaya.

Loma 7:22

Manuna yage gete yalobena 'aene yaluyaluwagu nuwanuwana be Yaubada 'ina loina yaguinuwe,

1 Kolinita 3:19

Manuna sinasinapu gete bale'u 'enega 'atuwa euwauwa Yaubada matanaya. Manuna Buki Tabu 'ena 'ina simana gete nadigega 'igwae, “Yaubada tosinasinapuyao 'i'onedi, be siesilae taudi 'idi gomanega.”

2 Kolinita 4:4

Taudi nigeya siemiemisa, manuna bale'u gete 'ina 'inapwana ni'atu 'igiekebodi, be 'enega maedana geya'abo si'ita'ita, nate Keliso 'ina esaesa tetelina, tauna 'ana 'ita Yaubada nadigega.

2 Kolinita 5:17

ta esi wanuwa'i'isi 'aene 'abo yaita Keliso 'enaya 'imiyami, tauna 'ietomota auwauna. 'Ina bubuna kadekadelina ni'atu 'igumwala, ta auwauna sa'i ni'atu 'iapwesama.

Galetia 1:4

Manuna Tamada Yaubada 'ina nuwanuwa gete nadigega, ga Yesu tauna 'itagwalena ga 'imwawasa 'ida loegesiyao manudi, be 'enega tuta gete to'umalina 'ina waiwaiyega 'i'etoseyeda,

Epeso 1:18

be wate 'atemiyega yage nidi bobo'adi manudi 'ibwauyemiya wada mwalatonidi, be wada emisa 'aene ma'etamo walobadi, be wada mwalamwalatoni wate 'ina eguyai sinabwana 'ina tomotaiyao 'edaya, nate tauna 'ina esaesa 'enega,

Epeso 2:2

Ona'ai'aila, lowa bubuna bale'u waguiguinuwedi, manuna yaluyaluwa to'umalidi ta waiwaidi 'idi 'inapwana, tauna tomiya mwatui waematamatanena. Tauna yaluyaluwa nina taudi tole'oa loina simulimuliye be 'atediya 'imiyami.

Epeso 5:17

'Enega geya'abo waeuwauwa, ta esi nuwami 'ida sabwalena, to'ase Yaubada 'ina nuwanuwa manumi nadigega.

Kolose 1:9

Tuta nina tetelimi 'agimi nonona ga 'ana laba batuwa, nigeya 'ima sidasida manumi 'ada losa'u, ta esi Yaubada 'ena 'a'awa'awanoi be 'aene Yaluyaluwa Tabuna 'ida gienuwa sabwalenimi, be 'enega wada mwalatoi 'ai'aila to'ase 'ina nuwena manumi,

Kolose 3:10

ta bubuna auwauna walobena, manuna Tomweluluwa nina tuta maibo'ana 'igiegie auwaumi, be 'aene tauna wada mwalamwalatoni be 'ina bubuna wada etotowane.

Kolose 4:12

Epapila wate 'ina lokagutoki 'emiya, tauna 'ebweu 'imi boda 'emiyega, ta 'iguiguinuwa To'etoseyana Yesu manuna, ta wate 'ina sidasidao 'ediya 'isidasida waiwai be 'aene wada toolopa'ala ma imi bubuna maibo'ana bobo'ana, nadigega Yaubada nuwanuwana.

1 Tesalonaika 4:3

Yaubada nuwanuwana 'imi miya 'esasena, ta geya'abo waloeloelata,

Taito 3:5

ga 'i'etoseyeda, nigeya 'ida guinuwa palupaludi manudi, ta esi tauna 'ina 'atenuwa 'ole'oleyega. 'Enega 'ina Yaluyaluwa Tabuna 'enega 'ida to'umalinao 'i'utudi, ga 'igie'esaseda, ta yawasida auwauna 'i'ebwa'eda.

Yemesa 1:27

Ta esi tapwalolo 'esasena be palupaluna Yaubada Tamada matanaya gete, 'aene taudi sinasinagenidi be kwabulao 'idi miyamwau 'enaya tada lemedi, ta wate geya'abo bubuna bale'u 'enega tagiegie bailida.

Yemesa 4:4

'Omi toemisa kabokaboyao, wada mwalatoni 'aene 'abo bale'u bubunina waoboobobome, nate Yaubada waetalauwale, manuna 'abo yaita bale'u bubunina nuwanuwana, tauna Yaubada 'ana saiya.

1 Pita 1:14

Ta Yaubada 'ena wada ematamatana ta geya'abo 'imi yalakwaiyao siloiloinemi, nadigega lowa 'imi tuta emwagemwage 'enaya.

1 Pita 1:18

Lowa 'imi bubuna tubumiyao 'ediyega nigeya bobo'ana, 'enega Yaubada emaisa 'iguinuwena sabi 'etoseyemi. Ta 'ami e'isa nina ni'atu wamwalamwalatoni 'aene nigeya yage gumwagumwalidi, nadigega siliba nai goula,

1 Pita 2:3

Ona'ai'aila, 'ida 'Inapwana 'ina 'atenuwa'ole'ole ni'atu walotoona,

1 Pita 4:2

'Enega 'ida tuta maibo'ana bale'uya tamiyami, tada tagwaleda Yaubada 'enaya be tauna 'ida loineda, ta 'ida yalakwaiya geya'abo 'iloiloineda.

2 Pita 1:4

Ta wate 'ina onaupaupa bobo'adi ta waiwaidi 'ediyega bubuna bale'u 'ana yalakwaiyao to'umalidi waebesinedi, ga Yaubada 'ina bubuna bobo'ana walobena.

2 Pita 2:20

Taudi lowa 'ida 'Inapwana ta 'ada To'etoseyana Yesu Keliso tetelina siemisena ga bubuna bale'u sipilisinena, ta 'eguma siila limana bubuna kadekadelidi 'ediya ma'etamo sineeneta, ta 'enega taudi sito'umali 'ai'aila.

1 Yoni 3:13

'Enega tasigwao, geya'abo wanuwanuwa owana 'abo me bale'u sietalauwaleda.

1 Yoni 5:19

Ta wate 'abo'ada tamwalamwalatoni 'aene Yaubada 'ienatuneda, ta sa'i bale'u bubunina 'ana tomuliyao yauyaudi toto'umalina nina 'ina bodao.

E'ita'ita 12:9

Yobai nina bweyabweyalina ta sinabwana, tauna gimimwata 'ana esana Seitani, 'atuwa Taumudumudulele, tauna bale'u 'ana tokabo. Tauna ma ina aniloseyao maibo'adi bale'uya siula mwa'utedi.

E'ita'ita 13:8

Ta me bale'u yauyaudi ma'etamo 'ena sibwabwago, nate taudi 'abo nigeya 'adi esanao simiyami yawasi bukina solanaya, buki nina Lami nina siloemwawasina 'ina buki, manuna buki gete solanaya taudi 'adi esanao lowaenei 'igimi 'etoladidi, 'enega muliyega bale'u 'imweluluina.