Genesis 10:5 - Die Bybel 2020-vertaling

⁵ deur hulle is die eilande van die nasies bevolk, almal in hulle eie lande, elkeen met sy eie taal, volgens hulle grootfamilies, volgens hulle nasies.

Bybel vir almal

⁵ Party van hierdie mense het oral in ander lande en naby die see gaan woon. Daar was verskillende families en volke. Elke volk het in sy eie land gewoon en het sy eie taal gepraat.

Afrikaans 1933-1953

⁵ uit hulle het verdeeld geraak die kuslande van die nasies, in hulle lande, elkeen na sy taal, volgens hulle geslagte, in hulle nasies.

Afrikaans 1983

⁵ Uit hulle het die mense wat nou die kusstreke bewoon, daarnatoe versprei, volgens hulle stamme en nasies, elkeen met sy eie taal.

Contemporary Afrikaans Bible 2023

⁵ Hierdeur is die eilande van die heidene verdeel in hulle lande; elkeen volgens sy tong, volgens hulle geslagte, volgens hulle nasies.

Die Boodskap

⁵ Uit hierdie nageslag van Jafet het al die seevolke ontstaan; elke volk met sy eie taal en kultuur asook sy eie mense.

Genesis 10:5 Kruisverwysings

Genesis 10:20

Dit was dan Gam se nageslag, volgens hulle grootfamilies, met hulle eie tale, in hulle eie lande, volgens hulle nasies.

Genesis 10:25

Vir Heber is twee seuns gebore: die een se naam was Peleg, want in sy tyd het die aarde verdeeld geraak, en sy broer se naam was Joktan.

Genesis 10:32

Dit was die grootfamilies van Noag se seuns volgens hulle familiegeskiedenis, volgens hulle nasies. Uit hulle het die nasies oor die aarde versprei ná die vloed.

Genesis 10:4

Jawan se nageslag was Elisa, Tarsis, die Kittiërs en Dodaners –

Genesis 10:6

Gam se nageslag was Kus, Egipte, Put en Kanaän.

Genesis 9:19

Hierdie drie was die seuns van Noag, en uit hulle is die hele aarde bevolk.

Ester 10:1

Koning Ahasveros het belasting ingestel in die hele land en die eilande van die see.

Psalms 72:10

Die konings van Tarsis en die eilande sal belasting betaal; die konings van Skeba en Seba sal skatplig lewer.

Jesaja 11:11

Op daardie dag sal my Heer weer, vir 'n tweede keer, sy hand uitsteek om die oorblyfsel van sy volk te koop – hulle wat oorgebly het in Assirië, Egipte, Patros, Kus, Elam, Sinar, Hamat en die eilande van die see.

Jesaja 24:15

Daarom, vereer die Here in die land van die môrelig! Vereer in die eilande van die weste die Naam van die Here, die God van Israel.

Jesaja 40:15

Kyk, nasies is soos 'n druppel uit 'n leersak; hulle word beskou as net 'n lagie stof op 'n weegskaal. Kyk, eilande weeg Hy asof dit fyn stof is.

Jesaja 41:5

“Die eilande het dit gesien en is bevrees, die eindes van die aarde beef. Hulle het nader gekom, hulle het aangekom;

Jesaja 42:10

Sing vir die Here 'n nuwe lied, besing sy roem van die einde van die aarde af, julle wat die see bevaar, en alles wat in die see is, ook die eilande en hulle bewoners.

Jesaja 42:4

Hy sal nie weifel en nie geknak word nie, totdat hy reg op die aarde gevestig het; op sy lering wag die eilande. ”

Jesaja 49:1

Luister na my, eilande, gee aandag, afgeleë nasies! Die Here het my reeds geroep toe ek in die moederskoot was; Hy het reeds my naam genoem toe ek in my moeder se liggaam was.

Jesaja 51:5

bring Ek my geregtigheid nader. My verlossing is op pad; my arms sal reg verskaf aan die volke. Op My wag die eilande, op my arm is hulle hoop gevestig.

Jesaja 59:18

Volgens verdienste vergeld Hy: woede vir sy teenstanders, en wat hulle verdien, vir sy vyande. Die eilande vergeld Hy volgens verdienste.

Jesaja 60:9

Ja, op My wag die eilande; die skepe van Tarsis vaar aan die voorpunt om jou kinders van ver af te bring. Hulle silwer en goud is by hulle, ter ere van die Naam van die Here, jou God, ter ere van die Heilige van Israel, omdat Hy jou verheerlik het.

Jeremia 2:10

Ja, gaan maar oor na die eilande van die Kittiërs en kyk self! Stuur maar na Kedar 'n afvaardiging, en let goed op – kyk of so iets al gebeur het!

Jeremia 25:22

al die konings van Tirus; al die konings van Sidon; die konings van die kuslande oorkant die see;

Esegiël 26:15

“So sê die Heer, die Here, vir Tirus, ‘ Sal, van die geluid van jou val, by die gekreun van die gewondes, met die groot slagting in jou, die eilande nie bewe nie?

Esegiël 26:18

Nou sidder die eilande op die dag van jou val; die kuslande by die see is angsbevange oor jou uitvaart.” ’

Daniël 11:18

Dan sal hy sy aandag vestig op die eilande en baie daarvan inneem, maar 'n •aanvoerder sal sy onbeskaamdheid vir hom tot 'n einde bring; sy onbeskaamdheid sal hy hom vergeld.

Sefanja 2:11

Vreesaanjaend sal die Here vir hulle wees; Hy het immers al die gode van die aarde laat wegkwyn. So sal dan elke bewoner van al die eilande, elkeen vanuit sy woonplek, diep voor Hom neerbuig –

Deuteronomium 32:8

Toe die Allerhoogste vir die nasies hulle erfenis gegee het, toe Hy mensekinders van mekaar geskei het, het Hy die grense van volke vasgelê volgens die getal van die kinders van Israel;