2 Konings 3:13 - Die Bybel 2020-vertaling

¹³ Elisa het vir die koning van Israel gesê: “Ek het met jou niks te doen nie. Gaan na die profete van jou pa en jou ma!” Maar die koning van Israel sê vir hom: “Nee, want die Here het hierdie drie konings ontbied om hulle oor te gee in die hand van Moab.”

Bybel vir almal

¹³ Maar Elisa het vir die koning van Israel gesê: “Hoekom kom jy na mý toe? Gaan na jou pa en jou ma se profete toe.” Die koning van Israel sê toe: “Nee, want ek dink die Here het ons drie konings geroep om ons vir die Moabiete te gee.”

Afrikaans 1933-1953

¹³ Maar Elísa het aan die koning van Israel gesê: Wat het ek met u te doen? Gaan na die profete van u vader en die profete van u moeder! Maar die koning van Israel antwoord hom: Ag nee, want die Here het hierdie drie konings geroep om hulle in die hand van die Moabiete te gee.

Afrikaans 1983

¹³ Elisa het vir die koning van Israel gesê: “Het ons nog iets vir mekaar te sê? Gaan na die profete van jou pa en jou ma toe.” Maar die koning van Israel het vir hom gesê: “Nee, dit is tog die Here wat hierdie drie konings geroep het net om hulle in die mag van Moab oor te gee.”

Contemporary Afrikaans Bible 2023

¹³ Toe sê Elísa aan die koning van Israel: Wat het ek met jou te doen? gaan na die profete van jou vader en na die profete van jou moeder. Toe sê die koning van Israel vir hom: Nee, want die HERE het hierdie drie konings bymekaargeroep om hulle in die hand van Moab te gee.

Die Boodskap

¹³ Elisa het egter vir Joram gesê: “Ek wil niks met jou te doen hê nie. Gaan na jou pa en ma se profete toe. Hulle het mos ander gode gedien.” Joram het geantwoord: “Dit sal nie help nie. Dit was juis die Here wat ons drie hierheen laat kom het sodat die Moabiete ons kan oorwin!”

2 Konings 3:13 Kruisverwysings

1 Konings 17:18

Sy sê toe vir Elia: “Wat het jy teen my, man van God? Het jy na my gekom om my sondeskuld bloot te lê en my seun te laat sterf?”

1 Konings 18:19

Daarom, stuur boodskappers uit, bring die hele Israel by my byeen op die berg Karmel, ook die vierhonderd-en-vyftig profete van Baäl en die vierhonderd profete van Asjera wat aan die tafel van Isebel eet.”

1 Konings 22:6

Die koning van Israel het toe die profete byeengebring, ongeveer vierhonderd man, en vir hulle gevra: “Moet ek teen Ramot in Gilead optrek vir die geveg, of moet ek daarvan afsien?” Hulle antwoord was: “Trek op! My Heer sal dit in die hand van die koning gee.”

2 Konings 3:10

Die koning van Israel sê toe: “Ag, die Here het hierdie drie konings ontbied om hulle oor te gee in die hand van Moab!”

2 Konings 3:12

Daarop sê Josafat: “By hom is die woord van die Here!” Toe gaan die koning van Israel en Josafat en die koning van Edom af na hom toe.

Spreuke 1:28

“ Dan sal hulle na my roep, maar ek sal nie antwoord nie; hulle sal my soek, maar my nie vind nie.

Jeremia 37:19

Waar is julle profete wat vir julle geprofeteer het, ‘Die koning van Babilonië sal julle nie oorval nie, en ook nie hierdie land nie?’

Hosea 6:1

“Kom ons keer terug na die Here – want Hy is die Een wat ons verskeur het, maar Hy sal ons gesond maak; Hy het ons geslaan, maar Hy sal ons wonde verbind.

Matteus 8:29

Skielik het hulle begin skreeu: “Los ons uit, •Seun van God! Het U voortydig hierheen gekom om ons te pynig?”

Johannes 2:4

Maar Jesus sê vir haar: “Vrou, waarom pla u My? My uur het nog nie aangebreek nie. ”

2 Korinthiërs 5:16

Gevolglik ken ons van nou af niemand meer na sy uiterlike nie. Selfs al het ons Christus eens na die uiterlike leer ken, ken ons Hom nou nie meer so nie.

2 Korinthiërs 6:15

En watter ooreenstemming is daar tussen •Christus en Belial, of wat het 'n gelowige gemeen met 'n ongelowige?

Rigters 10:14

Gaan dan, roep om hulp na die gode wat julle gekies het; laat hulle julle verlos in julle tyd van nood.”

Rut 1:15

Naomi sê vir haar: “Kyk, jou skoonsuster het omgedraai na haar volk en na haar gode toe. Gaan terug, agter jou skoonsuster aan.”