2 Konings 17:34 - Die Bybel 2020-vertaling

³⁴ Tot vandag toe handhaaf hulle die vroeëre gebruike. Hulle het nie ontsag vir die Here nie, en tree nie op in ooreenstemming met die vaste voorskrifte en bepalings wat hulle ontvang het nie, of ooreenkomstig die wet en gebod wat die Here die nageslag van Jakob, aan wie Hy die naam Israel gegee het, beveel het nie.

Bybel vir almal

³⁴ Hulle doen dit vandag nog. Hulle dien nie die Here reg nie, want hulle is nie gehoorsaam aan die wette wat die Here gegee het vir die nageslag van Jakob nie. Die Here het vir Jakob die naam Israel gegee

Afrikaans 1933-1953

³⁴ Tot vandag toe handel hulle volgens die vroeëre gebruike: hulle vrees die Here nie, en handel ook nie volgens hulle insettinge en volgens hulle gebruike nie, of volgens die wet en volgens die gebod wat die Here die kinders van Jakob beveel het, aan wie Hy die naam Israel gegee het.

Afrikaans 1983

³⁴ Tot vandag toe handhaaf hulle hulle vroeëre gebruike: hulle handel nie presies volgens die voorskrifte, die bepalings, die wet en die gebod wat die Here opgedra het aan die kinders van Jakob nie, dié Jakob aan wie Hy die naam Israel gegee het.

Contemporary Afrikaans Bible 2023

³⁴ Tot vandag toe doen hulle volgens die vroeëre gebruike: hulle vrees die HERE nie en doen nie volgens hulle insettinge of volgens hulle verordeninge of volgens die wet en gebod wat die HERE die kinders van Jakob beveel het, wat Hy Israel genoem het nie;

Die Boodskap

³⁴ Dit gaan vandag nog so aan. Hulle hou by hulle tradisionele gebruike in plaas daarvan om die Here werklik te dien. Hulle behoort sy wette, reëls en riglyne te gehoorsaam, soos Hy dit vir die nageslag van Jakob, wie se naam Hy na Israel verander het, beveel het.

2 Konings 17:34 Kruisverwysings

Genesis 32:28

Toe sê hy: “Jy sal nie meer Jakob genoem word nie, maar Israel. Want jy het met God en mense stryd gevoer, en het oorwin.”

Genesis 32:29

Jakob vra toe en sê: “Maak asseblief u Naam bekend!” Maar hy het geantwoord: “Waarom vra jy dan my Naam?” Hy het hom toe daar geseën.

Genesis 33:20

Jakob het daar 'n altaar opgerig en dit genoem El-Elohe-Jisrael.

Genesis 35:10

God het vir hom gesê: “Jou naam is Jakob. Jy sal nie meer Jakob genoem word nie, maar Israel, dit sal jou naam wees.” So het Hy hom die naam Israel gegee.

1 Konings 11:31

Hy sê toe vir Jerobeam: “Neem vir jou tien stukke, want so sê die Here, die God van Israel, ‘Kyk, Ek gaan die koningskap uit die hand van Salomo skeur, en tien stamme aan jou gee.

1 Konings 18:11

En nou sê u, ‘Gaan sê vir jou heer: “Elia is hier!” ’

1 Konings 18:31

Elia het twaalf klippe geneem, in ooreenstemming met die getal van die stamme van die seuns van Jakob, vir wie die Here gesê het: “Israel sal jou naam wees.”

2 Konings 17:25

Aan die begin van hulle verblyf het hulle nie vir die Here ontsag gehad nie. Die Here het toe leeus onder hulle ingestuur, wat aanmekaar van hulle doodgemaak het.

2 Konings 17:33

Vir die Here het hulle ontsag gehad, maar hulle eie gode het hulle bly dien in ooreenstemming met die gebruik van die nasies waarvandaan hulle weggevoer is.

2 Konings 17:40

Hulle het egter nie geluister nie, maar ooreenkomstig hulle vroeëre gebruike opgetree.

Psalms 55:20

God hoor en sal hulle verneder – Hy regeer immers van die voortyd af, – Sela hulle by wie daar geen verandering is nie, en wat nie ontsag het vir God nie.

Spreuke 14:2

Wie in sy opregtheid die lewenspad loop, het ontsag vir die Here, maar hy wat op kronkelpaaie gaan, verag Hom.

Jesaja 48:1

Luister hierna, huis van Jakob, wat met die naam Israel genoem word, en uit die waters van Juda voortgekom het, wat in die Here se Naam 'n eed aflê en hulle op die God van Israel beroem, maar nie in waarheid en geregtigheid nie,