Juan 16:32 - Porciones del Nuevo Testamento

³² Ewarita arabaidꞌebema ya arabasia, mawũẽ marã abꞌa abꞌakꞌa wãẽbadꞌaya mazhi wãbʉrʉma, aramaʉ̃ne mʉrã ãmaẽnaña dobꞌa. Mawũãmina mʉrã dobꞌa bꞌʉ ẽã mʉ Zezeta bꞌʉba mʉ ũme.

Juan 16:32 Kruisverwysings

Mateo 26:31

Maʉ̃ne Jesúsbara mawũãsia: Marãbara mʉrã jõmaʉ̃ba ãmaẽnaña nane diamase. Maʉ̃ẽnabemata zhi bꞌʉmata mawũã bꞌʉa: Mʉãrã ãzhi akʉbarita beaya, mawũẽ oveja ãba bꞌera jãrãzoaya.

Mateo 26:56

Mawũãmina naʉ̃ jõma kꞌãwũã berabꞌariya, aranaʉ̃ne arimaẽ berabꞌariya naʉ̃ẽnabemata zhi bꞌʉmata Daizezeba bedꞌeata jarabibarirãba jaradꞌapeadꞌata. Izha jʉrʉkuadꞌabara jõmaʉ̃ba Jesús ãmaẽbʉdata merũ wãẽbasidꞌa.

Marcos 14:27

Maʉ̃ne Jesúsbara mawũãsia: Marãbara mʉrã jõmaʉ̃ba ãmaẽnaña nane diamase. Maʉ̃ẽnabemata zhi bꞌʉmata mawũã bꞌʉa: Mʉãrã ãzhi akʉbarita beaya, mawũẽ oveja jãrãzoaya. (Zacarías 13:7)

Marcos 14:50

Izha jʉrʉkuadꞌabara jõmaʉ̃ba Jesús ãmaẽbʉdata merũ wãẽbasidꞌa.

Juan 12:23

Mawũẽ Jesúsbara panaʉ̃ mawũãsia: Ewarira arabasia mʉ Beubari Bape bꞌʉra beudꞌata piradrʉpe ʉ̃taa wãĩta.

Juan 16:2

De zhi jʉrebadata nʉme maẽ marã edꞌa wãbidꞌa ẽbaya, ewarita zeya bariduba marã beabʉrʉdꞌera krĩchaita Daizezeba krĩñata obʉrʉta.

Juan 16:25

Maʉ̃ mʉãrã ne jarakꞌa jarabʉrʉa. Ewarita zeya mʉã jarabʉrʉra ne jarakꞌa jara ẽãta, awuarabʉrʉ marãã jipa jaraya mʉ Zezedꞌebemata.

Juan 16:31

Mawũãnaĩ Jesúsbara panaʉ̃ mawũãsia: ¿Idꞌibʉrʉ ĩjãbʉdakꞌa?

Juan 19:27

Mobebʉrʉ maʉ̃ izha jʉrʉdꞌaa mawũãsia: Kꞌãʉ̃ bʉ papaa. Maʉ̃ ewadeba izha jʉrʉdꞌabara zhi papa kĩrãkꞌa erubꞌasia izhi dedꞌa.

Juan 20:10

Mobebʉrʉ Jesúsba jʉrʉkuadꞌara wãsidꞌa ãzhi panʉma.

Juan 4:21

Mawũãĩ Jesúsbara mawũãsia: Mʉã za jaraita ĩjãrũã, ewarita zeya, maʉ̃nerã marãbara naʉ̃ kꞌatumane miã Jerusalénne ibia jaradꞌa ẽã Daizezera.

Juan 4:23

Mawũãmina ewarita zeya, maʉ̃ ewarira ya arabasia, mawũẽ Daizeze wãrĩnu ibia jara bꞌebara Jawurebiadꞌeba wãrĩnu ibia jaradꞌaya, Daizezebara krĩña bꞌʉa izhira mawũã ibia jaradꞌaita.

Juan 5:25

Mʉã wãrĩnu marãã jaraya: Ewarita zeya, maʉ̃ ewarira ya arabasia, mawũẽ aduaita bꞌebara ũrĩnaña mʉ Daizeze Warra nemita, mʉ bedꞌeata ũrĩbʉdara Daizeze ũme bꞌai jõ ẽã bꞌeaya.

Juan 5:28

Mʉã maʉ̃ta jarabʉrʉ kꞌarea kꞌawua ẽã krĩcharãũdua, ewarita zeya, maʉ̃ ewadera beudꞌapeadꞌata jou nʉmebara ũrĩnaña mʉ nemirã.

Juan 8:16

Mʉã zhãrãnebemata jarara mʉãrã wãrĩnuta jaraya mʉrã abꞌa nʉmʉ ẽbaera, awuarabʉrʉ daira panʉã mʉta mʉ Zeze mʉ zokꞌadꞌata.

Juan 8:29

Mʉ zokꞌadꞌara mʉ ũme bꞌʉa, aramaʉ̃ne mʉ Zezebara mʉrã dobꞌa kenabꞌari ẽã, mʉãrã ewariza obꞌʉba izha krĩñata.

Hechos 21:6

Aramaʉ̃ne zhiya zhi burakuape dai barcodꞌe ʉ̃tʉ wãbʉdadꞌera ãzhira jẽrũya wãsidꞌa ãzhi dedꞌaa.

Hechos 8:1

Sauloma biga basia Esteban beabʉdara. Abꞌaʉ ewade mebẽrã bĩ ẽã osidꞌa Jerusalénne bꞌeta. Mawũẽ Jesúsba zokꞌakuadꞌa wãna ẽãnerã ãzhira jõma jãrãzoa wãsidꞌa Judea druadꞌe, Samaria druadꞌe.