Tơdrông Tơ'bôh 21:4 - Sơ̆p Hlabơar Nơ̆r 'Bok Kei-Dei

⁴ 'Bok Kei-Dei sut pơgoh đak măt lu sư, lu sư ưh pă lôch dơ̆ng, lu sư ưh pă đei tơdrong nhơ̆m hmoi ơh sơ'ngon dơ̆ng ôh, ưh pă đei tơdrong jĭ jăn păn hnong, yua kơ chăl arih so hiong tôch boih.”

Tơdrông Tơ'bôh 21:4 Kruisverwysings

Horiso 144:4

Kon bơngai thoi hơyuh dui jơhngơ̆m. Chăl kon bơngai thoi yơ̆p đông.

Êsai 25:8

Kră Yang pơtôch lê̆ bơih tơdrong lôch hiong ling-lang, Kră Yang gô sŭt lê̆ đak măt đơ̆ng muh măt rim 'nu, păng iŏk lê̆ tơdrong mơlâu đơ̆ng kon pơlei pơla Sư đơ̆ng jơ̆p-jang kơ teh đak. Kră Yang khan thoi noh.

Êsai 30:19

Ơ kon pơlei pơla oei lăm Siôn, lu bơngai oei lăm pơlei Jêrusalem, lu iĕm huay pă nhơ̆m hmoi dơ̆ng bơih. Mưh iĕm krao, sĭt Sư gô mơnat. Mưh kơtơ̆ng lu iĕm krao, Sư gô tơl hloi.

Êsai 35:10

Lu bơngai mă Kră Yang huai iŏk bơih gô brŏk. Năm mơ̆t tơ pơlei Siôn hăm tơdrong hơri chơt hiôk. Tơdrong hơri chơt hiôk ling-lang gô oei lăm kơ̆l lu sư. Lu sư gô đei tơdrong chơt hiôk, 'nă hal, na tơdrong ơh sơ'ngon chhŭr nuih gô hiong đĭ.

Êsai 51:11

Kon pơlei mă Kră Yang huai iŏk bơih gô brŏk, Năm mơ̆t tơ Siôn hăm tơdrong hơri chơt hiôk. Tơdrong hơri chơt hiôk ling-lang gô oei lăm kơ̆l lu sư. Lu sư gô đei tơdrong chơt hiôk, 'nă hal, tơdrong ơh sơ'ngon chhŭr nuih gô hiong đĭ.

Êsai 60:20

Măt 'năr ih ưh pă mơ̆t dơ̆ng bơih, măt khei ih kư̆m ưh pă weh hiong, yua kơ Kră Yang bơih tơdrong hơdah ling-lang ăn kơ ih. “Dôm lu năr ih nhơ̆m hmoi ơh sơ'ngon gô tôch đĭ.

Êsai 61:3

Wă ăn kơ lu bơngai ơh sơ'ngon oei tơ pơlei Siôn hơgăl pơkao tơplih kơ tơnuh tuh ăn đak 'bâu phu hiôk chơt tơplih kơ ơh sơ'ngon, pơhrŭk ăn ao bơnê ư-ang tơplih kơ jơhngơ̆m ơh klai. Đe gô krao sư tơm 'long kôih tơdrong tơpăt, 'long mă Kră Yang đei pơtăm bơih. Wă tơ'bôh tơdrong ư-ang Kră Yang.

Je 31:12

Lu sư gô năm hơri hiôk chơt tơ anih kơjung kơpal kông Siôn; muh măt lu sư chơt hiôk đơ̆ng Kră Yang ăn pŭn hiôk rơkah rơkai: 'Ba mi, sik hơmu, đak rơmă ôliwơ, kon triu, bơbe, sem dơrong, Jơhngơ̆m lu sư thoi pơgar đak hngôm hơiuh, ưh pă đei sơ'ngon kơ kiơ dơ̆ng.

Je 31:13

Lu adruh hle chơt hiôk suang pơplŏng, lu tơdăm păng lu kră drŏ-nglo kư̆m wang chơt hiôk; Inh gô tơplih tơdrong ơh sơ'ngon lu sư jing tơdrong chơt hiôk, Inh gô pơlung lu sư ăn kơ lu sư tơdrong chơt hiôk tơplih kơ tơdrong ơh sơ'ngon.”

Hôsia 13:14

Inh gô dŏng pơklaih lu sư đơ̆ng tơdrong pran kơtang dêh atâu, păng gô pơklaih lu sư đơ̆ng tơdrong lôch. Ơ tơdrong lôch tơ yơ tơdrong lôch hơbuh gơh pơrăm? Ơ dêh atâu tơ yơ tơdrong ih gơh pơrăm. Inh pă gơh mơnat boih.

Mathiơ 24:35

Plĕnh teh gô hiong tôch đĭ, mă-lei dôm tơdrong Inh pơma ưh kơ đei layơ hiong tôch ôh, gô 'bôh tơpă.

I Kor 15:26

Mă tuch-luch ning-mônh 'Bok Kei-Dei gô pơrăm tôm tơdrong kơnê̆ na bơ̆n ưh pă lôch dơ̆ng.

I Kor 7:31

Lu bơngai hăt kơ tơdrong ala teh âu 'nĕ pă tơchĕng dêh gah tơdrong ala teh âu yua kơ đĭ dôm tơdrong ala teh âu gô hiong hiach hach răm tôch đĕch.

II Kor 5:17

Thoi noh na bu kiơ̆ Yêsu Krist, bơngai noh bơ̆n băt kơ 'Bok Kei-Dei pơjing sư jing bơngai 'nao, dôm tơdrong so ưh pă đei boih, sư đei tơdrong 'nao ngăl, yua kơ sư jing bơngai 'nao boih.

II Kor 6:17

“Thoi noh yua kơ Inh Kră Yang iĕm na Inh athei iĕm lĕch jăk đơ̆ng lu bơngai ưh kơ lui. Tơklah đơ̆ng lu sư, 'nĕ pă pel 'bơm dôm tơdrong kơnê̆ 'mê̆-'mach lu sư, na Inh gô sơng iŏk iĕm.

Hêbrơ 12:27

Nơ̆r Sư pơkă, pă minh 'măng noh, wă khan, gô truh năr ei kơnh, Sư wă gơgŭ adrŏ plĕnh păng teh mă đêl Sư pơjing wă pơtôch boih, na dôm tơdrong mă ưh kơ gơh adrŏ, tơdrong noh oei ling-lang.

II Pet 3:10

Gah tơdrong Kră Yang Yêsu Krist wă jur, Sư wă jur tơpă, mă Sư wă jur thoi bơngai tơtông ưh kơ ăn đe băt. Kơplah noh kơnh plĕnh gô đôh hiong đĭ minh 'măng, re jơwa dêh, pă băt dang yơ. Ŭnh gô sa kơngla kơdơ̆r jơ̆p teh, teh jing hiong pă 'bôh kiơ. Lu sơnglŏng, khei păng đĭ dôm tơmam ala teh kư̆m lek hiong lei-lăi.

I Yo 2:17

Ala teh âu dôm tơdrong kon bơngai 'maih iŏk gô răm, mă-lei dah bơngai bu pơm trŏ thoi 'Bok Kei-Dei wă, bơngai 'noh gô arih ling-lang.

Tơdrông Tơ'bôh 20:13

'Bơ̆t ei gô 'bôh tôm bơngai lôch. Lu bơngai lôch glơ̆k kơ đak dơsĭ, đak dơsĭ tơlĕch sư. Yŏng pơgơ̆r tơdrong lôch achăng đĭ lu bơngai lôch đơ̆ng dêh atâu. Na 'Bok Kei-Dei sek tơlang lu sư kiơ̆ kơ tơdrong lu sư đêl pơm tơ ala teh.

Tơdrông Tơ'bôh 20:14

Đơ̆ng noh dêh atâu păng yŏng pơgơ̆r tơdrong lôch kư̆m trŏ kơ tơlơ̆ sư tơ dơnâu ŭnh mơ̆n. 'Noh tơdrong lôch mă 'bar.

Tơdrông Tơ'bôh 21:1

Đơ̆ng noh inh đei 'bôh plĕnh păng teh 'nao, yua kơ plĕnh păng teh adrol sơ̆ tôch boih. Mă đak dơsĭ kư̆m pă đei boih.

Tơdrông Tơ'bôh 22:3

Tôm tơdrong kiơ 'Bok Kei-Dei jô̆ khan kơnê̆ ưh kơ 'bôh lăm pơlei noh. Pôm 'Bok Kei-Dei hăm Kon Triu đĕch oei hơdai hăm kon pơlei pơla lăm noh. Lu đĭch đam Sư gô kơkuh kơ Sư tơ noh.

Tơdrông Tơ'bôh 7:17

Kon Triu oei hơdai Pơtao bơ̆n 'Bok Kei-Dei, Sư wei-lăng lu đe noh, anhăk ba lu sư truh boih tơ tu đak mă ăn kơ kon bơngai arih ling-lang. 'Bok Kei-Dei sut đak măt lu sư huay pă nhơ̆m hmoi boih.”