Philip 2:16 - Sơ̆p Hlabơar Nơ̆r 'Bok Kei-Dei

¹⁶ Iĕm tơ'bôh kơ lu sư tơdrong 'Bok Kei-Dei ăn kơ kon bơngai arih, thoi noh na lăp truh năr Yêsu Krist jur ning-mônh jơhngơ̆m inh hiôk dêh, yua kơ tơdrong jang inh đei yua; ưh kơ sĭ jang tŭk đĕch ôh.

Philip 2:16 Kruisverwysings

Horiso 40:9

Lăm năr akŭm tih inh ră roi boih kơ tơdrong 'nao 'lơ̆ng tơpăt Ih; to, inh ưh kơ đei ôn 'bơ̆r, Ơ Kră Yang, inh băt boih tơdrong noh.

Horiso 71:17

Ơ Kră Yang 'Bok Kei-Dei, Ih bơtho boih inh đơ̆ng oei 'lơ̆p. Dĭng truh tơ dang ei, inh oei roi tơbăt gah tơdrong jang hlĭch chrơp Ih.

Êsai 49:4

Mă-lei inh khan: “Inh jang gleh lap hŭt đĕch. Inh huach jơhngơ̆m ưh kơ yua păng tơdrong kơ đei. Mă-lei tơpă tơdrong tơpăt inh tơ lăm Kră Yang, tơdrong apah bơnê inh tơ lăm Kră Yang 'Bok Kei-Dei inh.”

Mathiơ 10:27

Thoi noh na tơdrong âu Inh bơtho kơdrô̆ iĕm, thoi lĕ kơ bơtho lăm măng mu ưh kơ đei bu băt, ưh kơ đei bu 'bôh. Mă-lei iĕm gô bơtho tơ hơdah măt 'năr, wă khan iĕm gô bơtho tơ anăp bôl lơ.

Luka 12:8

“Inh khan kơ iĕm tơpă, bu roi kơ đe khan sư lui kơ Inh, ning-mônh Inh Kon Bơngai kư̆m gô roi kơ lu linh jang 'lơ̆ng 'Bok Kei-Dei bơngai noh sư lui kơ Inh tơpă mơ̆n.

Yo 6:63

“Dah jơhngơ̆m đon iĕm lui kiơ̆ tơdrong Inh, lei iĕm gô arih ling-lang. Dah iĕm kiơ̆ tơdrong akâu akar đĕch, lei ưh kơ đei yua kiơ ôh. Dôm nơ̆r Inh bơtho khan ăn kơ iĕm gah tơdrong sa sĕch akar Inh, Inh wă ră kơ jơhngơ̆m đon iĕm lui kiơ̆ kơ Inh na iĕm gô arih ling-lang; lei ră.

Yo 6:68

Pêtrôs khan kơ Sư: “Ơ 'Bok, nhôn wă kiơ̆ bu dơ̆ng lĕ? Tơdrong Ih bơtho khan wă ăn kơ nhôn gô arih ling-lang tơpă.

Jang 13:26

“Ơ lu 'nhŏng oh adrĕch adrung kon sâu Abraham păng lu bơngai tơmoi năm kơkuh kơ 'Bok Kei-Dei, Kră Yang 'Bok Kei-Dei ăn kơ bơ̆n dang ei tơdrong dŏng pơklaih.

I Kor 1:8

Sư ăn kơ iĕm oei lui kơjăp truh năr tôch, wă kơ iĕm oei 'lơ̆ng tơpăt huay kơ đei tơdrong yoch kiơ kơplah năr Kră Yang Yêsu Krist jur.

I Kor 9:26

Thoi noh na inh adrin kơdâu tơng-lơ̆ ưh kơ đei weh-woh tơ̆p truh tơ anih đêl đe pơkă 'mơ̆i. Păng inh ưh kơ sĭ thoi lu bơngai mă chok ưh kơ 'bơm ôh.

II Kor 1:14

Dang ei iĕm tam mă băt nhên nhôn bơngai thoi yơ, layơ kơnh iĕm kư̆m hlôh mơ̆n. Thoi noh na mưh Kră Yang Yêsu Krist jur, iĕm hiôk yua kơ nhôn pơm 'lơ̆ng; nhôn kư̆m hiôk yua kơ iĕm lui đơ̆ng nhôn bơtho.

Galati 2:2

Inh năm tơ Pơlei Jêrusalem yua kơ 'Bok Kei-Dei athei inh năm. Inh akŭm păng lu bơngai pơm tih pơgơ̆r bơngai lui, wă roi kơ lu sư tơdrong 'nao 'lơ̆ng inh bơtho kơ lu bơngai mă ưh kơ khŭl Juđê. Nhôn akŭm kơdrô̆ nhôn đĕch. Inh roi kơ lu sư nhên gah tơdrong inh bơtho wă kơ lu sư băt dôm tơdrong inh bơtho noh, jĭ minh tơdrong trŏ tơpă. Dah inh ưh kơ roi kơ lu sư, lei inh hli kơ lu sư jô̆ kơ inh bơtho tơdrong ưh kơ tơpă. Mă-lei lu sư ưh kơ đei jô̆ kơ tơdrong jang inh khan tơdrong jang ưh kơ tơpă, lu sư ưh kơ đei khan thoi noh ôh.

Galati 4:11

Inh tơtăm kơ lu iĕm, hli kơ tơdrong jang inh tơgŭm iĕm mă ưh kơ đei yua.

Philip 1:6

'Bok Kei-Dei jô̆ iĕm jing bơngai 'lơ̆ng boih, na inh băt tơpă Sư gô tơgŭm iĕm ling-lang truh tơ năr Yêsu Krist jur ning-mônh.

I Tes 2:19

Nhôn 'mêm kơ iĕm tơpă; ning-mônh lăp Kră Yang bơ̆n Yêsu Krist jur tơ ala teh dơ̆ng, nhôn chơt hiôk tơpă, yua kơ iĕm lui kơ Yêsu đơ̆ng lu nhôn bơtho iĕm ki. Na nhôn băt kơ Sư lăp đon kơ tơdrong jang nhôn.

I Tes 3:5

Yua kơ iĕm đei tơdrong đe areh kơ iĕm tơpă, na inh pă kĕ ĕnh, na wơh Timôthê năm tơ iĕm ki, wă kơ sư jet iĕm, wă kơ băt iĕm oei lui kơjăp kơ Kră Yang Yêsu dah ưh. Inh hli dêh kơ yang Satan pơhlŭ iĕm achăng lê̆ tơdrong lui bơ̆n. Yua kơ đêl nhôn mah bơtho gleh tơpă tă ưh kơ yua kiơ, inh 'mêm dêh.

Hêbrơ 4:12

Yua kơ nơ̆r 'Bok Kei-Dei arih ling-lang, jăng dêh păng han hloh kơ đao 'bar pah măt, 'bet han klĕch tơ sĕch huan kơting, hrĕch kơtĕch jơhngơ̆m đơ̆ng bơhngol. Tơdrong Sư sek tơlang bơ̆n thoi noh. Sư băt tôm tơdrong đon tơchĕng kon bơngai 'maih pơm.

I Pet 1:23

Tơdrong bơ̆n tơpŭ ming 'nao ưh kơ sĭ đơ̆ng kon bơngai pơjing ôh, yua kơ kon bơngai nŏng kơ lôch; tơdrong tơpŭ ming 'nao đơ̆ng 'Bok Kei-Dei pơjing, 'Bok Kei-Dei ưh kơ layơ lôch. Sư pơjing bơ̆n jing bơngai 'nao yua kơ bơ̆n lui kơ nơ̆r Sư pơma, nơ̆r Sư ưh kơ layơ tơplih. Yua kơ nơ̆r Sư, na bơ̆n gơh arih ling-lang.

I Yo 1:1

Nhôn chih roi kơ iĕm gah tơdrong Yêsu Krist. Sư dang nơ̆r 'Bok Kei-Dei yua kơ Sư tơbăt ăn kơ bơ̆n tơdrong 'Bok Kei-Dei wă kơ bơ̆n arih ling-lang. Sư arih adrol kơ 'Bok Kei-Dei pơjing plĕnh teh sơ̆. Nhôn kơtơ̆ng Sư pơma. Nhôn 'bôh Sư păng măt nhôn kơdih păng ti nhôn mơn pel akâu Sư tơpă.

Tơdrông Tơ'bôh 22:17

Yang Bơhngol 'Lơ̆ng hăm akăn Kon Triu bơtho khan kơ lu bơngai tam mă lui thoi âu: “Bu ol kơ đak nhă bĕ.” Na lu bơngai lui mă mơ̆ng đe đŏk hla bơar tơdrong âu, bĕ lu iĕm kư̆m wang chă bơtho đe thoi noh mơ̆n, khan: “Bu ol kơ đak nhă bĕ.” Năm bĕ bu ol kơ đak, nhă đak noh; đak noh gơh arih kon bơngai ling-lang, nhă đĕch ưh kơ răt ôh.