Mathiơ 23:4 - Sơ̆p Hlabơar Nơ̆r 'Bok Kei-Dei

⁴ Lu sư pơkă kơ iĕm lơ tơdrong juăt kiơ̆ kơ lu sư tơchĕng kơdih, kư̆m dang lĕ lu sư tơpŭ kơ iĕm tơmam trăp hloh kơ ai tơ̆p pă kĕ gơrŭn, dah wă kiơ̆ pơđĭ tơdrong juăt noh, iĕm ưh kơ kĕ ôh păng lu sư ưh kơ tơgŭm iĕm hơya tŏ sĕt.

Mathiơ 23:4 Kruisverwysings

Êsai 46:1

Yang Bel kŭp kơ̆l, yang Nêbô drap, rup yang noh lu sư chơ kơpal rŏng lu sem brem, sem dơrong. Lu rup yang mă lu iĕm juăt kơ tung trăp dêh, pơm kơ lu sem brem chơ sư trăp pă kĕ.

Mathiơ 23:23

“Ơ lu thây bơtho đe Juđê păng lu bơngai kiơ̆ tơdrong Pharisi, ning-mônh iĕm pơmat-tat dêh, yua kơ iĕm bơngai 'bơ̆r đak klak ŭnh. Iĕm pơm hăt hot tĕch lu tơmam hơi thoi lĕ kơ hla lŭng-hŭng, hla gơsơ̆m, hla ĕch, hla hla-kat, iŏk jên noh pơm pơyơ̆r kơ 'Bok Kei-Dei minh lăm mơjĭt. Mă-lei dôm tơdrong juăt 'Bok Kei-Dei mă kăl hloh thoi lĕ kơ pơm 'lơ̆ng kơ đe, athei 'mêm kơ 'Bok Kei-Dei hăm bôl buăl, tơdrong lui kơ 'Bok Kei-Dei, dôm tơdrong noh iĕm pơhơi ưh kơ wă pơm. Mă tơdrong iĕm pơyơ̆r tơmam hơi noh kư̆m trŏ mơ̆n, mă-lei ưh kơ dang bơ̆n kiơ̆ tơdrong juăt noh hei.

Mathiơ 23:3

Iĕm athei pơm kiơ̆ thoi sư bơtho păng rok dôm tơdrong sư pơkă. Mă-lei iĕm 'nĕ kiơ̆ thoi tơdrong arih lu sư. Tơdrong lu sư bơtho 'lơ̆ng ră, mă-lei lu sư ưh kơ kiơ̆ tơdrong 'lơ̆ng noh ôh.

Luka 11:46

Na Yêsu khan dơ̆ng: “Ơ lu thây bơtho tơdrong juăt đe Juđê, ning-mônh iĕm kư̆m pơmat-tat dêh mơ̆n. Lu iĕm pơkă kơ đe lơ tơdrong juăt kiơ̆ kơ lu iĕm tơchĕng kơdih, kư̆m dang lĕ iĕm tơpŭ kơ đe tơmam trăp hloh kơ ai tơ̆p pă kĕ gơrŭn, mă-lei iĕm kơdih kư̆m ưh kơ đei tơgŭm sư hơya tŏ sĕt.

Jang 15:10

Kơlih kơ kiơ iĕm wă pơlong 'Bok Kei-Dei? Iĕm wă kơ lu bơngai tơmoi mă lui ei pŭ tơdrong anat kơ răk dôm lu tơdrong Môis pơkă. Mă-lei tơdrong 'noh lu 'bok kơdră bơ̆n pŭ ưh kơ kĕ ôh păng bơ̆n kư̆m ưh kơ kĕ mơ̆n.

Jang 15:28

Yang Bơhngol 'Lơ̆ng păng nhôn ưh kơ wă athei iĕm pơm lu tơdrong anat, mă-lei iĕm athei kiơ̆ lu tơdrong âu đĕch:

Galati 6:13

Lu bơngai wă pơgŏ iĕm noh, sư kăt tơdra akar sư kơdih mơ̆n mă-lei sư ưh kơ kiơ̆ tơdrong juăt Môis tơpă ôh. Lu sư wă kơ iĕm kăt tơdra akar iĕm kơdih đĕch păng sư wă pơma pơang kơ đe khan sư bơtho lơ bơngai chu kăt tơdra akar tơpă.

I Yo 5:3

Dah bơ̆n 'mêm kơ 'Bok Kei-Dei lei bơ̆n athei răk dôm tơdrong Sư pơkă. Dôm tơdrong Sư pơkă noh ưh kơ gleh ôh.

Tơdrông Tơ'bôh 2:24

‘Iĕm bơngai Pơlei Thiatir păng lu bôl iĕm mơ'nah kuă kơ kiơ̆ tơdrong yă Jesebel tơpă. Sư khan tơdrong sư bơtho tơdrong jrŭ, tơdrong hơgei, mă-lei iĕm kuă kơ pơhrăm iŏk hơya tŏ sĕt tơdrong noh yua kơ iĕm băt tơdrong noh tơdrong yang Satan đĕch. Bĭ mă Inh kư̆m ưh kơ đei pơthim kơ iĕm kiơ̆ tơdrong kiơ mă anat ôh.