Mathiơ 18:8 - Sơ̆p Hlabơar Nơ̆r 'Bok Kei-Dei

⁸ “Dah minh pah ti iĕm dah jơ̆ng iĕm pơm kơ iĕm yoch, chơ̆ng tŭk minh pah ti dah jơ̆ng noh, na oei pă minh pah ti dah jơ̆ng noh, mă-lei gơh mơ̆t oei hăm 'Bok Kei-Dei ling-lang. 'Noh 'lơ̆ng hloh kơ iĕm oei tôm 'bar pah jơ̆ng ti mă-lei wă huŏng pơđĭ hăm akâu tơ dơnâu ŭnh ưh kơ layơ păt.

Mathiơ 18:8 Kruisverwysings

Êsai 30:22

Lu iĕm gô tŭk hŭt lê̆ rup iĕm traih lom hăm hu păng rup man bah hăm maih, na lu iĕm klơ̆m lê̆ sư tơ ataih thoi tơmam 'mê̆-'mach. Păng khan: “Lĕch bĕ đơ̆ng anih âu!”

Êsai 33:14

Lu bơngai pơm yoch lăm pơlei Siôn hli tơrơ, bơngai ưh chu kiơ̆ kơ Kră Yang hli tơtơ̆ đĭ bơih. “Bu lăm lu bơ̆n gơh oei lăm ŭnh kơdơ̆r? Bu lăm lu bơ̆n gơh oei lăm pla ŭnh sa khơ̆ng ling-lang?”

Êsêkiên 18:31

Athei hŭt lê̆ bĕ tơdrong yoch kơnê̆ ataih đơ̆ng lu iĕm mă lu iĕm đei pơm boih, pơm ming bĕ kơ lu iĕm kơdih, jơhngơ̆m 'nao păng tơdrong arih 'nao, ơ adrĕch Isơrael, thoi yơ lu iĕm wă kơ lôch?

Mathiơ 17:27

Mă-lei ba ưh kơ wă pơkăl kơ lu bơngai iŏk thuê̆ ôh, ba athei duh pơyom. Na dang ei ih năm wah kơ ba ka tơ đak dơsĭ bĕ. Ih 'bôh ka mă kăp wah hơdrol ih iŏk pŏ 'bơ̆r sư hŏ, lăm 'bơ̆r sư noh đei minh hlak jên. Jên noh lăp tôm hloi kơ ba ăn thuê̆. Na ih iŏk jên noh ăn kơ lu bơngai mă iŏk thuê̆, khan kơ lu sư ba ăn tôm boih.”

Mathiơ 25:41

“Klaih kơ noh Inh pơma kơ lu bơngai mă oei gah 'ngiĕo kơ Inh dơ̆ng thoi âu: ‘Dang ei 'Bok Kei-Dei wă phak iĕm boih, iĕm jah weh đơ̆ng âu kơdâu năm tơ dơnâu ŭnh to bĕ. Ŭnh noh ưh kơ layơ păt, ŭnh noh 'Bok Kei-Dei hơmet ăn kơ yang Satan păng đĭ-đăng kơ lu linh jang kơ sư năm oei tơ lăm dơnâu ŭnh noh.

Mathiơ 25:46

Đơ̆ng noh 'Bok Kei-Dei phak lu sư tơ dơnâu ŭnh ling-lang ưh kơ layơ păt. Gah lu bơngai lui kơ 'Bok Kei-Dei 'lơ̆ng tơpăt, lu sư tŏk oei hơdai hăm 'Bok Kei-Dei ling-lang kư̆m ưh kơ layơ tôch.”

Luka 14:33

Kư̆m thoi noh mơ̆n, iĕm athei tơchĕng hơdrol 'mơ̆i, yua kơ bơngai bu ưh kơ tŭk dôm tơdrong sư kơdih, bơngai ei ưh kơ gơh jing bơngai kiơ̆ Inh ôh.

Luka 16:24

Na 'bok mơdrŏng ei krao pơret Abraham thoi âu: ‘Ơ Abraham, apinh ih mơnat kơ inh 'biơ̆, ih wơh Lasarơ năm djrŭ ti sư tơ đak năm kơtoh kơ 'bơ̆r inh 'biơ̆ bĕ wă klaih rơhing 'biơ̆, yua kơ inh oei lăm dơnâu ŭnh tŏ hang dêh.’

Rom 13:12

Dang ei oei măng mu, ưh pă đunh 'năr gô lĕch. Yua kơ thoi noh na bơ̆n 'nĕ pă oei tơ lăm măng mu, bơ̆n athei oei tơ hơdah ling-lang wă kơ gơh tơblah păng yang kơnê̆.

Tơdrông Tơ'bôh 14:10

bơngai noh 'Bok Kei-Dei hil areh tơpă, dang ăn kơ sư et sik hrăp, sik noh 'Bok Kei-Dei tring tơ kơchŏk 'nhŭ tăng hơ̆-hang. Bơngai noh gô hăl hang oei tơ anih pơmat-tat tơ lăm dơnâu ŭnh tơbang 'bơ̆t anăp lu linh jang 'lơ̆ng păng Kon Triu.

Tơdrông Tơ'bôh 20:15

Bơngai bu ưh kơ đei anăn đe chih tơ lăm sơ̆p hla bơar tơdrong arih, bơngai noh kư̆m trŏ kơ đe tơlơ̆ sư tơ lăm dơnâu ŭnh mơ̆n.

Tơdrông Tơ'bôh 21:8

Gah lu bơngai lêl, lu bơngai achăng tŭk tơdrong lui, lu bơngai pơm kơnê̆, lu bơngai pơlôch đe, lu bơngai pơm pơyô kư̆ kă, lu bơngai pơm pơjâu chă sol đe, lu bơngai kơkuh kơ yang nai, lu bơngai hơlĕnh pơdăr đon đe, đĭ lu bơngai thoi noh gô huŏng tơ dơnâu ŭnh tŏ hang hơt, 'noh tơdrong lôch mă 'bar.”