Mathiơ 10:16 - Sơ̆p Hlabơar Nơ̆r 'Bok Kei-Dei

¹⁶ “Inh wơh iĕm năm chă bơtho đe iĕm athei kơchăng hŏ, yua kơ dang lĕ wơh triu năm tơ kŏ-so. Na iĕm athei chă đon hơgei thoi 'bih, iŏk jơhngơ̆m dim dang kơtơp.

Mathiơ 10:16 Kruisverwysings

Bl 3:1

Âu, lăm lu kon sem brem mă đêl Kră Yang 'Bok Kei-Dei pơjing, 'bih boih mă adrĕch hơlĕnh kơnê̆. 'Bih sư pơma hăm bơngai drŏ-kăn khan: “Kră Yang 'Bok Kei-Dei đei khan tơtă ưh kơ ăn kơ măr iĕm sa plei 'long lăm pơgar âu dah kiơ?”

Bl 3:13

Kră Yang 'Bok Kei-Dei jet bơngai drŏ-kăn thoi âu: “Ih pơm kiơ thoi noh?” Bơngai drŏ-kăn tơl khan: “'Bih sư pơhlŭ inh na inh sa boih.”

Ne 4:13

Inh pơm pơjing lu kơđông tơ ala pah rŏng kơ dur pơlei păng tơ lu anih rơhơi; inh dan kon pơlei kiơ̆ kơ adrĕch adrung tơ noh đei chĕp đao hơlă păng hră.

Je 40:16

Mă-lei Gêđalia kon drŏ-nglo Ahikam khan kơ Jôhanan kon drŏ-nglo Karea: “Ih 'nĕ kơ pơm tơdrong noh; tơdrong ih khan gah Ismael noh ưh kơ trŏ ôh.

Hôsia 7:11

Êphraim thoi sem kơtơp kơwao, ưh kơ đei đon băt hlôh, lu sư krao apinh char Êyiptơ, năm tơ char Asiri.

Mathiơ 24:25

Iĕm athei kơchăng kơdih, yua kơ Inh roi kơ iĕm tôm tơdrong hơdrol boih.

Mathiơ 24:45

“Bơngai đĭch, sư athei jang tơnăp kiơ̆ thoi yŏng sư pơkă, na yŏng sư lăp đon pơjao ăn kơ sư pơm kai wei-lăng lu buăl sư dơ̆ng na mưh trŏ kơ jơ sŏng sa sư chă asong kơ lu bôl sư tơmam sa.

Mathiơ 25:2

Lăm lu sư noh đei pơđăm 'nu adruh đĕch kơchăng, pơđăm 'nu adruh ưh.

Mathiơ 25:4

Pơđăm 'nu adruh mă kơchăng noh, lu sư chĕp kơđeng păng chĕp hiă kơchai đak dâu trôl hloi.

Mathiơ 25:9

Na lu bôl sư mă kơchăng ei khan: ‘Ưh ôh, dah nhôn asong iĕm, hli kơ nhôn ưh kơ mah păng iĕm kư̆m ưh kơ mah mơ̆n. Iĕm athei năm răt kơdih tơ anih đe mơdro.’

Luka 10:3

Dang ei Inh wơh iĕm năm chă bơtho đe, na iĕm athei kơchăng hŏ, yua kơ dang lĕ wơh kon triu năm tơ kŏ-so.

Luka 21:15

yua kơ Inh gô ăn kơ iĕm 'bơ̆r đon hơgei, na lu bơngai ayăt 'noh gô thuơ kơ iĕm.

Jang 20:29

Inh băt đơ̆ng rŏng kơ inh tơklah đơ̆ng lu iĕm, lu bơngai kơnê̆ pă jor wă năm tơ iĕm, wă pơhlŭ lu bơngai lui achăng lê̆ Kră Yang Yêsu. Lu sư thoi lĕ kŏ-so wă rôp sa triu.

I Kor 14:20

Ơ 'nhŏng oh, gah tơdrong iĕm 'maih pơma nơ̆r hlĭch, iĕm athei tơchĕng kiơ̆ đon kră, 'nĕ pă kiơ̆ thoi đon bơngai nge. Bơ̆n băt kơ lu bơngai nge ưh kơ gơh pơm kơnê̆ kơ đe, dah bơ̆n kiơ̆ thoi noh 'lơ̆ng mơ̆n, mă-lei bơ̆n 'nĕ kơ kiơ̆ kơ đon sư tơchĕng, yua kơ sư ưh kơ hlôh ôh.

II Kor 1:12

Tơdrong nhôn hiôk, nhôn hiôk yua kơ tơdrong âu: Jơhngơ̆m đon nhôn mơn kơdih nhôn pơm 'lơ̆ng kơ đĭ-đăng bơngai; mă loi pơm 'lơ̆ng pơm tơpăt hăm iĕm. Mă-lei nhôn ưh kơ bơnê kơ akâu nhôn kơdih hơgei ôh, nhôn bơnê kơ 'Bok Kei-Dei tơgŭm nhôn pơm 'lơ̆ng thoi noh.

II Kor 11:14

Lu bơngai noh iĕm 'nĕ lăng hlĭch tơdrong kiơ, lu sư trŏ kơ khŭl yang Satan 'mơ̆i. Yang Satan phŏ sư kư̆m pơm thoi linh jang 'lơ̆ng.

II Kor 11:3

Inh hli kơ lu bơngai mă pơjăm inh pơhlŭ iĕm jing jrok trong ưh pă 'mêm kơ Yêsu Krist, thoi yă bơ̆n Ewơ lui kơ 'bih hơlĕnh pơdăr kơ sư sơ̆.

II Kor 8:20

Inh wă kơ lu bơngai noh tơgŭm gah tơdrong ra jên yua kơ inh hli kơ đe jô̆ kơ inh pơm ưh kơ 'lơ̆ng, pơm ưh kơ trŏ kơ tơdrong iŏk jên iĕm wă tơgŭm đe noh.

Philip 2:15

thoi noh đe anăn kon 'Bok Kei-Dei, adrin pơm 'lơ̆ng ling-lang, na huay kơ đei tơdrong yoch, mă khan iĕm oei tŏk-bŏk lu bơngai kơnê̆, lu bơngai hơlĕnh pơdăr, lu bơngai dang lĕ kơ oei lăm măng mu na lu sư gơh pơm dôm tơdrong 'noh. Gah iĕm hlôh wao tôm tơdrong boih, thoi lĕ kơ hơdah ŭnh, na iĕm athei pơchrang ăn tơdrong hơdah iĕm kơ lu sư kơplah oei tơ teh âu.

Kôlôsê 1:9

Thoi noh boih na đơ̆ng năr nhôn kơtơ̆ng tơdrong iĕm lui kơjăp, na nhôn krao khan kơ 'Bok Kei-Dei ăn kơ iĕm gơnang kơ Yang Bơhngol 'Lơ̆ng wă kơ iĕm hlôh băt tôm tơdrong 'Bok Kei-Dei, kiơ̆ thoi Sư lăp đon.

Kôlôsê 4:5

Bơ̆n athei adrin pơm mă 'lơ̆ng pơma mă trŏ kơ lu bơngai tam mă lui, wă kơ lu sư mơ̆ng trŏ na lui kơ 'Bok Kei-Dei.

I Tes 2:10

Hơtai ki iĕm kư̆m 'bôh dôm tơdrong nhôn pơm 'lơ̆ng tơpăt kơ lu iĕm bơngai lui kơ Yêsu. Nhôn ưh kơ pơm kơnê̆ ôh. 'Bok Kei-Dei Sư kư̆m 'bôh thoi noh mơ̆n.

I Tes 5:22

Dah tơdrong glăi iĕm săi tŭk.