Ju 1:9 - Sơ̆p Hlabơar Nơ̆r 'Bok Kei-Dei

⁹ 'Bok Mikael, 'bok mă pơgơ̆r tơduă lu sư linh jang 'lơ̆ng, kơplah yŏng yang kơnê̆ wă pơjei iŏk atâu Môis, 'bok Mikael ưh kơ pơ̆n pơma jâu kơnê̆ kơ yang ei ôh. Sư pôm pơma thoi âu đĕch: “Inh gô mơ̆ng kơ 'Bok Kei-Dei đĕch khă e.”

Ju 1:9 Kruisverwysings

I Ho 12:17

Đawit lĕch sơng lu sư păng khan: “Tơdah lu iĕm năm hăm tơdrong hiôk-hian păng wă tơgŭm inh lei jơhngơ̆m inh gô pơgơ̆p hăm lu iĕm; tơdah lu iĕm hơlĕnh blah inh wă tơgŭm kơ lu bơngai ayăt, lei apinh Kră Yang 'Bok Kei-Dei 'bok bơ̆n sek lăng păng phak lu iĕm; yua kơ ti inh ưh kơ đei pơm tơdrong kơnê̆ kiơ.”

Le 22:28

Ih 'nĕ kơ pơma kơnê̆ 'bơm Kră Yang 'Bok Kei-Dei păng kư̆m 'nĕ kơ hiap pơtê̆ yŏng pơlei pơla ih.

Da 10:13

Mă-lei pơtao dêh char Pherơsơ găn inh lăm 'bar-jĭt mônh năr; mă-lei, 'nâu, Mikael mă minh lăm lu Linh jang Tih hloh, đei truh păng tơgŭm inh boih păng inh oei tơ noh hăm lu pơtao Pherơsơ.

Da 10:21

Mă-lei inh khan kơ ih băt dôm tơdrong noh đei chih boih tơ lăm sơ̆p hla bơar tơdrong sĭt. Ưh kơ đei bu wă gơh dŏng tơgŭm inh tơblah hăm lu sư, 'nguaih kơ Mikael, yŏng lu iĕm.

Da 12:1

Lăm chăl noh, Mikael, Linh jang tih, noh boih yŏng wă iung wei kơ kon pơlei ih. Kơplah noh gô đei tơdrong gleh truh, iŏk đơ̆ng đei pơjing dêh char truh tơ dang ei tam mă đei tơdrong truh tih thoi noh. Dang ei lăm lu kon pơlei ih, dôm lu bơngai mă đei chih măt lăm sơ̆p hla bơar noh gô klaih păng arih ling-lang.

Sa 3:2

Kră Yang khan kơ Satan thoi âu: “Ơ Satan, thŭ Kră Yang hil hiap ih; Kră Yang Tơ'ngla mă rơih iŏk boih Jêrusalem hil chrih kơ ih. 'Nâu hăm trŏ thoi kơtôch đe 'nao dui đơ̆ng ŭnh?”

Markôs 15:29

Lu đe mă brŏk năm trong ei tơtreh kơ̆l tơhmăi Yêsu khan: “Hmăi Ih khan wă teng pơrăm hnam akŭm 'Bok Kei-Dei tơm wă pơm plơ̆ng kơtĕch pêng năr.

Both 34:6

Kră Yang 'bŭ sư lăm thŭng glă tơ dêh Môap, tơklă Bêt Pêôr; truh tơ dang ei ưh kơ đei bơngai bu mă băt kơ bơsat 'bŭ sư tơ yơ.

I Tes 4:16

Năr ei kơnh 'bok yŏng lu linh jang 'lơ̆ng gô pơma krao pơret đơ̆ng plĕnh ti păng đei linh jang 'lơ̆ng hlôm keng 'Bok Kei-Dei. Na Kră Yang Yêsu Krist jur hloi đơ̆ng plĕnh, na lu bơngai lôch mă lui kơ Yêsu boih sư iung arih 'mơ̆i.

I Pet 3:9

Mă đe pơm kơnê̆ kơ bơ̆n, bơ̆n 'nĕ pơm tơwih kơ đe; mă đe pơma kơnê̆ kơ bơ̆n, bơ̆n 'nĕ pơma tơwih kơ đe, bơ̆n rai krao khan apinh 'Bok Kei-Dei mơnat kơ sư dơ̆ng. Bĭ 'Bok Kei-Dei kư̆m mơnat kơ bơ̆n na Sư krao iŏk bơ̆n jing kon Sư.

II Pet 2:11

Lu linh jang pran hloh tih hloh, mă-lei lu linh jang ưh kơ pơ̆n kơ pơma kơnê̆ kơ lu bôl sư mă pơm yoch ôh kơplah sư roi kơ 'Bok Kei-Dei. Mă-lei lu bơngai noh ưh kơ băt kơ hli, lu sư pơma kơnê̆ hloi kơ lu linh jang.

Tơdrông Tơ'bôh 12:7

Đơ̆ng noh na đei tơdrong tơblah tơ plĕnh ti. Mikael pơm kră wei-lăng lu linh jang 'lơ̆ng, sư krao đĭ-đăng lu linh sư tơblah păng linh yă-grai păng akâu yă-grai kơdih hai.