Sunda hi suma hi Levi-nid’a 3:1 - Bible azumeina

¹ Ma didina mi de kua ala: Le sana mi he vama ngat buzu ma zlap darigïd’a mi an Ma didina, le mi he ni d’uwar ma ngol mandjuf foze d’a atchad’a ni, mi he ni ma bei daka ba na.

Sunda hi suma hi Levi-nid’a 3:1 Kruisverwysings

1 Sunda Hamuleinid’a 21:26

David mi min yima ngal ahle suma ngat buzuna mi Ma didina kamu, mi hahle suma ngat buzu suma ngala kahle suma ngat buzu suma zlap darigïd’a, mi tchen Ma didina mi. Ma didina mi hulongôm humba ni kakud’a. Akud’a ti tcholï akulo yam yima ngal ahle suma ngat buzu suma ngala.

Buzuk ka Abud’a 20:24

Agi minin yima ngal ahle suma ngat buzuna kandagad’a. Agi mba han ahle suma ngat buzu suma ngala kahle suma ngat buzu suma zlap darigïd’a ki d’uwar magi ma gureina ki ma nglona kamu. Ata yima lara ma human mba d’i gan yam simiyêna, an mba ni mba gevegiya, an mba ni b’e vunan kagi mi.

Buzuk ka Abud’a 24:5

Mi sun gro azungeî suma Israel-lâ á hahle suma ngat buzu suma ngala mi Ma didina, á ngad’am amuzleina ahle suma ngat buzu suma zlap darigïd’a mi.

Buzuk ka Abud’a 29:28

Ahle ndazina a arî b’raud’a hi Aron azi ki gromid’a. Ti arî gat ta Israel-lâ a mba tit kat burâ ki burîd’a, kayam ni vun ahle suma pat suma Israel-lâ a mba pad’azi kur ahle mazi suma ngat buzu suma zlap darigï suma a mba handjï mi an Ma didinina.

Zla d’a d’ogolâ 7:14

An ni he wa vama ngat buzu ma zlap darigïd’a, an ndak wa vun vun man ma hle ma an hlum mAlonina ini.

Ezekiyel 43:27

Bugol bur ma kid’iziya máma, tin ad’ud’a kur bur ma klavandina ar avok hî wani, suma ngat buzuna a han vama ngat buzu ma ngala ki vama ngat buzu ma zlap darigïd’a suma suma a mba handjina yam yima ngal ahle suma ngat buzunina. Hina wani, an mba ni vagi atanu. An Salad’a Ma didina ni de na.

Ezekiyel 45:15

Le ahok magina kur kangâna ni kikis mbà ni, agi vagi aduk tu, agi hagizi he d’a hawad’a mi. Agi hagi ahle ndazina he d’a hawa d’a afuta, he d’a hawa d’a ngat buzu d’a ngala d’oze he d’a hawa d’a ngat buzu d’a zlap darigïd’a kayambala an hurun vat tei yam tcho magid’a d’a. An Salad’a Ma didina ni de na.

Sunda hi suma hi Levi-nid’a 1:10

Le he d’a hawa mam mba ngala ni d’uwar ma gureina, nala, gor timina d’oze gor b’ëna ni, ar mi he ni mandjuf ma bei daka ba na.

Sunda hi suma hi Levi-nid’a 1:3

Le he d’a hawa mam mba ngala ni d’uwar ma ngolâ ni, ar mi he ni va mandjuf ma bei daka ba na, ar mi humî avun zlub’u d’a ngaf tad’a tala an Ma didina ni vum abomu d’a.

Sunda hi suma hi Levi-nid’a 17:5

Ni kayambala Israel-lâ a ngat ahle mazi suma ngat buzuna kä woi abagei kel luo a mbazi ni mi ma ngat buzuna avogon an Ma didina, avun zlub’u d’a ngaf tad’a, a hazi mi an Ma didina vama ngat buzu ma zlap darigïd’a d’a.

Sunda hi suma hi Levi-nid’a 3:6

Le he d’a hawa mam mba ngat buzuna á zlap darigïd’a, le ni d’uwar ma gor mandjufâ d’oze d’a atchad’a ni, mi he ni ma bei daka ba na.

Sunda hi suma hi Levi-nid’a 9:18

Mi ngat amuhlâ ki gamlâna vama ngat buzu ma ngal ma zlap darigï ma ablau suma a huma. Groma a mbam buzuna; mi yamam huyok yima ngal ahle suma ngat buzuna.

Sunda hi suma hi Levi-nid’a 9:4

agi vagï amuhlâ ki gamlâna á hazi vama ngat buzu ma zlap darigïd’a mi Ma didina zlapa ki he d’a hawa d’a afut ta a tib’eget ki mbulîd’a, kayam Ma didina nga mi nde tam mbei iragi ini.

Amos 5:22

Ata yima agi nga mbandï ahle suma ngat buzu suma ngala ki he d’a hawa d’a afutina, an nga ni vazi abogi d’i. Ata yima agi nga mbandï ki gro amuzlei suma d’orâ ahle suma ngat buzu suma ngalina, an nga ni golozi ki iran nduo ko.

Malatchi 1:14

Vun ma ged’a yam sama lop ir ma mi nga ki timi mam ma djivina aduk d’uwar mama, mi hle vunam kam á ngad’andji mi an Ma didina ko ba, mi vragam ki ma dakina. An Ma didin ma ad’engên kal petna ni de na, kayam an namul ma ngolâ, simiyên ni ma kal papa aduk suma petna mi.

Malatchi 1:8

Ma didin ma ad’engêm kal petna mi dala: Ata yima agi nga mbagi ki vama ngat buzu ma dukina, ni tchod’a d’uo zu? Ata yima agi nga mbagi ki vama ngat buzu ma dileîd’ina, d’oze ma tugud’eid’ina, ni tchod’a d’uo zu? Ang hazi mi mang ma te yamba go! Mba mi vazi abong zu? Mba mi vang atam djivid’a zu?

Ndumba 15:8

Le a han namuhlâ vama ngat buzu ma ngala d’oze vama ngat buzu ma zlap darigïd’a d’oze á ndak vun vun ma hled’a d’oze vama ngat buzu ma hawana ni,

Ndumba 6:14

Mi mba ki he d’a hawa mamba mi an Ma didina, nala, timi ma bizam tu ma bei dakina vama ngat buzu ma ngala, timi d’a bizat tu d’a bei dakid’a vama ngat buzu ma zlup yam tchod’a ki gamlâ ma bei dakina vama ngat buzu ma zlap darigïd’a.

Gat ta a hat á mbàd’id’a 12:27

Agi mba hagi hliuna ki buzuna he d’a hawa d’a ngala yam yima ngal ahle suma ngat buzuna hi Ma didina Alo maginina. Ahle magi suma ngat buzu suma dingâ, buzuwazi mba mi djang kä woi yam yima ngal ahle suma ngat buzuna hi Ma didina Alo maginina. Agi mba mud’ugi hliuna.

Kolos-sâ 1:20

Ni kayam ndata ba, Alona mba ki b’leng nga halasa yam buzuna hi Gorom ma djang ngei ata agu ma b’alina. Kayam ndata, Alona mi zlap ahlena pet darigïd’a ki mamu, nala, ahle suma yam andagad’ina kahle suma sä akulona mi.

Hebre-na 10:22

Kayam ndata, ei hud’i go gen Alona ki hur ma tuna ki he gagazi d’a ndak memeta ki huri ma mbusa woi yed’et yam djib’er ra tcho d’a kuri krovod’a pet ki ta d’a a mbuzut tei ki mbiyo ma hirwilingîd’a.

1 Jean 1:3

Vama ami wamizina, vama ami humumizina, ami nga lagi glangâsâ kam mi, kayam agi lagi darigïd’a ki sed’emiya. Darigï meid’a ni kAbui Alona ki Goroma Jesus Christ.

Suma ka sariyad’a 20:26

Israel-lâ pet kablau suma pet a mba Betel, a kak kua avok Ma didina, a d’el tazi bei te tena gak fladege, a hum he d’a hawa d’a ngala ki he d’a hawa d’a ngat buzu d’a zlap darigïd’a mi.

Suma ka sariyad’a 21:4

Tcha yorogod’a ablau suma a min yima ngal ahle suma ngat buzuna kua kolâ, a he he d’a hawa d’a ngala, a he he d’a hawa d’a ngat buzu d’a zlap darigïd’a mi.