Jeremi 7:23 - Bible azumeina

²³ Wani vun ma an hazizina ba wana: An dazi ala: Agi humun vunanu. Hina wani, an mba ni arî Alo magina, agi mba kagi ni sum mana mi. Agi tid’igi kur lovot ta an hagi vuna kata, agi mba kagagi ki furîd’a mi.

Jeremi 7:23 Kruisverwysings

Wana ni mbaktumba hi Job-pa 36:11

Le azi huma a hulong yazi kä ni, a mba dap bur mazina ki djivid’a, a mba dap biza mazid’a ki furîd’a ndjundjum mi.

Sawal la giled’a 119:3

Gagazi, a nga le vama tcho d’i, a nga tit kur lovot mamba.

Sawal la giled’a 40:6

Ma didina Alo mana, sun mang nga nglo d’a kal tegles sa ang lat kamid’a ki nga hur mang ma ang ngam kamina a zul ablaud’a heî. Sama d’igi ang na na nga d’i! An min de woi kazi kua, an min tchi wala woi kaziya, wani azi kal ablaud’a heî, an ndak á vazi ad’uzi woi pet ti.

Sawal la giled’a 81:13

Kayam ndata, an arazi kur hur mazi ma b’al ma kiki na; a tit bugol nga hur mazina mi.

Buzuk ka Abud’a 15:26

Mi dazi ala: Le agi humugi del an Ma didina Alo magina djivid’a, le agi lagi ahle suma d’ingêrâ avoronu, le agi tinigi humagi yam vun man ma hed’a, le agi ngomogi gat manda pet mi ni, an mba ni tumugi ki tugud’ei d’a an tum ki Ezipte-nid’a tu d’i. Kayam an ni Ma didin ma sud’ugi woina.

Buzuk ka Abud’a 16:32

Moise mi dala: Wana ni vama Ma didina mi he vuna kama mi dala: Agi ngomogi manna kilona mbà yam andjavagi ma agi mba vud’um bugolâ, kayam azi we avungô ma an hagizi abagei hur fulâ ata yima an buzugugï woi kur ambas sa Ezipte-d’ina.

Isai 3:10

Agi nga dagi yam ma d’engzengâ ala mam mba mi kak ki djivid’a; ahle suma mi lazina, mba mi faziya.

Jeremi 11:4

Ni vun ma djin ma an djinim kabuyogi ngolo ata yima an buzuguzï woi kur ambas sa Ezipte-d’a d’igi für ma kaweina na na, an dazi ala: Agi humugi vama an hagi vuna kama, agi tid’igi yam vama an hagi vuna kama mi. Hina wani, agi mba mbud’ugi sum mana, an mba ni arî Alo magina mi.

Jeremi 11:7

Gagazi, an le glangâsâ mabuyogi ngolo, tinï ad’ud’a ni kur bur ma an ni buzuguzï woi kur ambas sa Ezipte-d’a dei gak ini. An nga ni mba á lazi glangâsâ ala: Agi humundi vunanu.

Jeremi 13:11

D’igi sana mi djin d’i’â furum na, an djin wa Israel-lâ ki suma Juda-na furun ndala azi ka’î sum mana, a yan simiyênu, a gilenu, a han ngola mi d’a. Wani azi humun nga d’i. An Ma didina ni de na!

Jeremi 22:21

Ata yima ndak nga kur ndjondjoîd’ina, an dak zlad’a, wani ndak dala: An min humung ngi. Wana ni tit maka ki gogorok dei. Ndak humun nga vunan ndi.

Jeremi 22:3

Ma didina mi dala: Ar agi kagi sariya d’a d’ingêra, agi prud’ugi suma a b’ad’azi ahligiyezina woi abo suma a nga b’ad’azi ahligiyezi kad’engina. Ar agi lagi angeina d’oze ma hokuyod’a d’oze ta modonod’a tchod’a d’i, ar agi lagi murud’umba d’i, ar agi tchagi suma bei zlad’a kazi ba na kä ata yima wana d’uo mi.

Jeremi 24:7

An mba ni malazi djib’er ra kuruzid’a woyo, azi mba wala an ni Ma didina, azi mba mbut sum mana, an tan mba ni arî Alo mazina, azi mba hulongî geven ki hur ma tuna.

Jeremi 31:33

Ma didina mi de kua ala: Wana ni vun ma djin ma an mba ni djinim ki Israel-lâ bugol bur mámina: An mba ni tin gat manda kuruziya, an mba ni b’irit krovo kur mugulazi mi. An mba ni ka’î Alo mazina, azi mba ka’î sum mana mi.

Jeremi 32:23

Azi mba, a hlad’u, wani a humung nga vunang ngi, a tit nga yam gat manga d’i, a le nga ahle suma ang hazi vuna kazi á led’ina d’uo mi. Ni kayam ndata ba, ang mba ki ndak ka wanda kazi wana.

Jeremi 38:20

Jeremi mi hulong dum ala: Azi mba hang abozi d’i. Ang hum dela hi Ma didina d’a an nga ni dangzid’a, va mba lang ngi, ang mba sud’a.

Jeremi 42:6

Le ni zla d’a djivi d’oze zla d’a tcho, ami mba gami yami kä ad’u dela hi Ma didina Alo mami ma ami sunung gevema. Hina wani, ami mba lami furîd’a ata yima ami gami yami kä ad’u dela hi Ma didina Alo maminid’a.

Sofoni 3:2

Azi hum nga yid’a hi Ma didinid’a d’i, a nga min ngop pa mi ngobozid’a d’i, a nga tin huruzi kam mbi, a nga hut gevem mam Alo mazina d’uo mi.

Zakari 6:15

Suma a mba tcholï ata yima deina, a mba le sunda kur gong nga kud’ora hi Ma didinid’a. Kur bur máma agi mba wagi ala ni Ma didin ma ad’engêm kal petna ba, mi sununï gevegiya. Le agi gagi yagi kä ad’u Salad’a Alo magina gagazi ni, ahle ndazina pet a mba le na mi.

Zakari 7:7

Agi wagi nga zla d’a Ma didina mi dat mi suma djok vuna kid’a Jerusalem nga kaka tchugot kazì ma nglo ma nguyutna ata yima suma a i kak abo ma sutna ki hur fulina mi d’a d’uo zu?

Romê-na 16:26

Wani ki tchetchemba, zla d’a muduri ndata a ndat tei kur mbaktumba hi suma djok vun Alonid’a. Alo ma didina mi he vuna ala a tagat tei mandjaf suma pet, kayam a he gagazid’a, a ge yazi kä ad’um mi.

2 Korente-na 10:5

kahlena pet suma a nga le yam mba ad’enga á kak djangûna ki wed’a hAlonid’ina, ami nga mbud’umi djib’er ra lara ge pet kä á ge yat kä ad’u Christ.

Gat ta a hat á mbàd’id’a 11:27

Le agi nga tid’igi yam vun ma hed’a hi Ma didina Alo magina ma an nga ni hagizi ini wana ni, mam mba mi b’e vuna kagiya.

Gat ta a hat á mbàd’id’a 13:4

Agi zlabagi darigïd’a ki Ma didina Alo magina, agi lum mandaramu, agi ngomogi vun ma he mama, agi gagi yagi kä ad’u zla mamba. Ni mam ba, agi kud’uromu, agi reyêgi tagi ki sed’em mi.

Gat ta a hat á mbàd’id’a 13:5

Ma djok vun máma d’oze ma vana nde tam mbei iram máma, agi tchum mbeyo, kayam mi de ni zla d’a kak djangûna ki Ma didina Alo magi ma buzugugï woi kur ambas sa Ezipte-d’a ma mi tchugugi akulo woi kur azì ma a lagi magomba kuana. Sa máma mi min d’ezegi ni woi kur lovot ta Ma didina Alo magina mi hagi vuna kat á tid’igi kuad’a. Hina wani, agi mba d’elegi tcho d’a led’a adigagiya.

Gat ta a hat á mbàd’id’a 30:2

Ata yi máma le agi ki grogina gagi yagi kä avok Ma didina Alo magina ki hur ma tuna ki tagi pet d’igi vun ma he ma an hagizi ini na na ni,

Gat ta a hat á mbàd’id’a 30:20

Agi lagi yam Ma didina Alo magina, agi gagi yagi kä avoromu, agi kagagi ni suma d’engzengâ avoromu, agi zlabagi tu ki sed’emu. Hina wani, agi mba kagagi ki arid’a, agi mba tagi ngola tatâ yam andaga d’a mam hle vunam kat á hat mabuyogi ngolo Abraham, Isak ki Jakob-pa.

Gat ta a hat á mbàd’id’a 30:8

Wani agi mba gagi yagi kä avok Ma didina Alo magina kua, agi mba tid’igi yam vun ma hed’a pet ma an hagizi inina.

Gat ta a hat á mbàd’id’a 4:10

Agi djib’eregi yam bur ma agi tchologi avok Ma didina Alo magina yam ahina d’a Horep-pina. Ata yi máma Ma didina mi dan ala: Ang togonï suma; an min ala a hum zla manda tala azi hat á lan mandaran burâ ki burâ yam andagad’a ka hî, a had’at mi grozina mi d’a.

Gat ta a hat á mbàd’id’a 4:40

Agi ngomogi gat mamba ki vun mam ma he ma an nga ni hagizi inina kayambala agi ki grogi suma blogogina, agi kagagi ki furîd’a tala agi tagi kagagi tatâ yam andaga d’a Ma didina Alo magina nga mi hagizi ki iragi fafat wanda d’a.

Gat ta a hat á mbàd’id’a 5:16

Ar ang hu abung kasungû, d’igi an Ma didina Alo mangâ ni hang vuna na, kayam ang te ngola tatâ ki furîd’a yam andaga d’a an Ma didina Alo mangâ mba ni hangzid’a.

Gat ta a hat á mbàd’id’a 5:29

Djiviya! Ladjï huruzi nga ni tinda kan hina teteu á ringîn mandaran á ngom gat manda mi ni, azi ki grozina a mba ka’î ki djivid’a teteu.

Gat ta a hat á mbàd’id’a 5:33

Agi tid’igi kur lovot ta Ma didina Alo magina mi tagagizid’a memet tala agi kagagi karid’a ki furîd’a agi tagi ngola tatâ yam ambas sa agi nga hlat wanda d’a.

Gat ta a hat á mbàd’id’a 6:3

Agi Israel-lâ, agi humugiya, agi ngomogiziya, agi tid’igi kazi mi kayambala agi kagagi ki furîd’a, agi zulugi ngola d’igi Ma didina Alona habuyogi ngolona mi de na kur ambas sa ambira ki mbul ayuma a nga sor kä kuad’a d’a.

Hebre-na 5:9

Ata yima mi ndak memetna, mi mbut Sala sut ta didinda yam suma pet suma a nga ge yazi kä ad’uma.

1 Samuel 15:22

Samuel mi dum ala: Na ni Ma didina tam mbi lum djivid’a yam he d’a hawa d’a ngala ki vama ngat buzuna kal ge yam mba kä ad’u zla mambid’a zu? Nga na d’i! Wani ge yam mba kä d’a kal ahle suma ngat buzuna; hum vun Alona kal ahok suma mbul suma a ngad’amzina.