Jeremi 33:7 - Bible azumeina

⁷ An mba ni hulongî ki suma Juda suma a yozi magombina ki Israel suma a yozi magombina mi, an mba ni kagazi b’langâzina d’igi adjeu deid’a na.

Jeremi 33:7 Kruisverwysings

Sawal la giled’a 126:1

Ni sawal la suma a djak Jerusalem á lü vun tilîna a hlata. Kid’a Ma didina mi hulongî mam suma a yozi magombina avo Siyon-nda, ami djib’eremi ni d’igi adïd’a dami ni ndat na!

Sawal la giled’a 126:4

Ma didina, ar ang hulongî ki mami suma a yozi magombina d’igi mbiyo ma mi djang abo ma sutnina na.

Sawal la giled’a 14:7

Ni nge ba, mba mi mba ki suta yam Israel-lâ kur Siyon nge? Fata Ma didina mba mi hulongôzï woi kur magombid’a, ata yi máma andjafâ hi Jakob-ma mba mi le furîd’a, Israel-lâ a mba le hur ma hapma.

Sawal la giled’a 85:1

Ni sawal la gile d’a Kore groma a hlat a hat mi ma ngolâ hi suma hle sawalina.

Isai 1:26

An mba ni hulong tin mang suma ka sariyad’a d’igi suma adjeuna na, an mba ni tin mang suma de d’alâ d’igi suma avo’â na mi. Bugola, a mba yang ala Azì ma ngol ma d’ingêrâ, Azì ma ngol ma d’engzengâ mi.

Isai 52:8

Mak suma ndjola a nga de zlad’a ki delezi akulo, a nga er ad’uzi akulo ki furîd’a abo tazi tu, kayam a nga we Ma didina ki irazi nga mi hulongî kur Siyon.

Jeremi 23:3

An mba ni togï tumiyô mana ad’uzi d’a ara kur ambas sa lara ge d’a an digizi woi kuad’a, an mba ni togozi kur kangâ mazina; a mba vut ablaud’a, a mba zul ndjondjoî mi.

Jeremi 24:6

An mba ni tin iran kazi á wazi hohowoziya, an mba ni hulongôzï kur ambas sa kä wanda, an mba ni minizi akulo, an mba ni b’lagazi woi d’i, an mba ni pazi ni kä, an mba ni pad’azi woi d’i.

Jeremi 29:14

Ma didina mi dala: An mba ni tak tan ndei iragiya, an mba ni buzugugï woi kur magomba, an mba ni togogi woi aduk andjaf suma pet ata yima lara ma an ndjoyôgi woi kuana, an mba ni hulongôgï ka hî ata yima an yogi ni igi magomba woi kuana. An Ma didina ni de na.

Jeremi 30:18

Ma didina mi dala: Gola! An nga ni hulongî agi suma hi Jakob-ma woi kur magomba, an nga ni we hohowa yi magi ma kaka. Azì ma ngolâ a mba minim ata blangâm ma b’lak keina, azì ma amula a mba minim ata blangâm ma adjeuna mi.

Jeremi 30:20

Agi andjafâ hi Jakob-ma, agi mba mbud’ugi ni d’igi blangâgi ma adjeuna na, agi mba togogi avoron kua, an mba ni mba á ngop suma a nga djobogi vunagina pet.

Jeremi 30:3

An Ma didina nga ni dangû, burâ nga mi mba, ni bur ma an mba ni hulongî man suma Israel-lâ ki man suma Juda-na woi kur magombina, an mba ni hulong ni mbazi ka hî yam ambas sa an hat mabuyozi ngolod’a, azi mba kak kat kua.

Jeremi 31:28

D’igi an tin iran kazi avok á pad’azi woi á tozi woi á b’lagazi woi á dabazi woi á lazi tchod’a na, an mba ni tin iran kazi á minizi akulo, á pazi ka hina dedege mi. An Ma didina ni de na.

Jeremi 31:38

Ma didina mi de kua ala: Gola! Burâ nga mi mba. Kur bur máma a mba hulong min azì ma ngolâ akulo yam an Ma didina. Mba tinï ad’ud’a ata gong nga fiyak ka akulod’a hi Hananel-la yam gulumun ma ngui azì ma ngolîna dei gak mba ata vun agrek ma gulumuna mi kong kuana.

Jeremi 31:4

Ndak gor wei d’a Israel-la, an mba ni hulongôk blangâk ma adjeuna, ndak mba min tak ki daliyâ mak ka djifâ min nda dinga kua á nde ndjongâ aduk suma a nga lü ndjongâ ki furîd’ina.

Jeremi 32:44

A mba gus asinena ki beged’a, a mba b’ir mbaktum mba gusa, a mba tumut ki tampongâ, a mba yi suma glangâsâ yam ambasa hi suma hi Benjamin-nid’a kazì ma ngui Jerusalem-ma, kur azì ma nglo ma Juda-na, kur azì ma nglo ma yam ahinad’ina, kur azì ma nglo ma yam andaga d’a abo tat tud’a, kur azì ma nglo ma abo ma sutnina mi. Kayam an mba ni hulongî ki mazi suma a yozi magombina avo. An Ma didina ni de na.

Jeremi 33:11

sawal la hur ma hapma ki sawal la furîd’a. A mba hum sawala hi ma tel atchad’a awilina ki sawala hi d’a a telet awilid’a kur ambas sa wanda. A mba hum dela hi suma a hle sawal la wandina ala: Agi gilegi Ma didin ma ad’engêm kal petna, kayam Ma didina ni ma djivina, kayam o mamba nga d’i dap pi. A mba hum dela hi suma a nga hahle suma ngat buzu suma le mersid’ina kur gong man nda kud’ora. Kayam an mba hulongî ki suma a yozi magomba kur ambas sa wandina, an mba ni kagazi blangâzi d’igi adjeu deid’a na. An Ma didina ni de na.

Jeremi 33:26

ata yi máma an mba ni gandjafâ hi Jakob-ma ki ma hazong mana David-na woyo, an mba ni hle sa ad’u andjavam aduk suma a mba te yam andjafâ hi Abraham-ma yam andjafâ hi Isa’â yam ma hi Jakob-ma d’uo mi. Kayam an mba ni hulongî ki mazi suma a yozi magombina avo, an mba ni wazi hohowozi mi.

Jeremi 42:10

Le agi aragi kaka kur ambas sa wanda ni, an mba ni minigi akulo, an mba ni b’lagagi woi d’i, an mba ni pagi ad’ugi kä, an mba ni pad’agi woi d’i. Kayam an mbut hat hurun yam tcho d’a an lagizid’a.

Jeremi 50:4

Ma didina mi dala: Kur bur máma, ata yi máma, Israel-lâ ki suma Juda-na a mba mba asem taziya, a mba tit ki tchina iraziya, a mba halan an Ma didina Alo mazina.

Hor ma tchina 4:22

Ndak gor weid’a Siyon, sariya d’a yam tcho makid’a ndak da’. Mi mba mi ik magomba d’uo d’a. Ndak gor weid’a Edom, ni yam tcho maka ba, mi mba mi gad’agu, mba mi gak ad’u tcho maka woi abu mi.

Ezekiyel 39:25

Gola! An Salad’a Ma didina ni dala: Ki tchetchemba, an mba ni hulong suma hi Jakob suma a yozi magombina avo, an mba ni we hohowa Israel-lâ pet, an mba ni ngom simiyên Ma bei tchod’a ba na djivid’a mi.

Wana ni mbaktumba hi Oze-d’a 2:15

An Ma didina ni dala: An mba ni wuragat yam bur ma ndat ti ngal dubang ma his djivid’ina mi Bäl ti nik ngangama atchinat ti tchuk hed’euna kelet ti ring bugol buniyôtna ti maran ndei na.

Sofoni 3:20

An Ma didina nga ni dagi kua: Kur atchogoi ndata an mba ni hulongôgïya, natchogoi d’a an mba ni togogi kuad’a, kayam an mba ni mbud’ugi ni vama simiyêm yina ki vama giled’a aduk andjaf suma pet suma yam andagad’ina fata an hulongî magi suma a yozi magombina kä iragid’a.

Zakari 1:17

Malaikana mi dan kua ala: Ang tchi wal la dinga ala: Ma didin ma ad’engêm kal petna mi dala: Azì man ma nglona mba mi fe djivid’a, an mba ni man Jerusalem man nda dinga, an mba ni ndjun Siyon mi.