Jeremi 23:22 - Bible azumeina

²² Ladjï azi kak ata yi man ma de d’alâ ni, azi ndak á de zla man nda an data mi sum mana, azi ndak á hulongôzï woi kur tit mazi d’a tchod’a ki sun mazi d’a asa’at ta azi lata mi.

Jeremi 23:22 Kruisverwysings

Jeremi 23:14

Wani an we sun nda ndjendje d’a kala nga aduk suma djok vun suma Jerusalem-ma. A nga le mizeuna, a nga tit ni kur zla d’a kad’a, a nga had’enga mi suma asa’atna, a nga ar lovota mi sa tu á hulongî woi kur sun mam mba asa’ata d’i. Azi pet a mbut iran ni d’igi suma Sodom-ma na, suma a nga kaka avo Jerusalem-ma a mbut iran ni d’igi suma Gomor-râ na mi.

Jeremi 23:18

Wani ni nge adigazi ba, mi kak ata yima an nga ni de d’alîna ge? Ni nge ba, mi we d’oze mi hum zla d’a an Ma didina ni data ge? Ni nge ba, mi tin humam mi hum zla manda mi wat ad’ut djivid’a ge?

Jeremi 25:5

Azi nga dagi ala: Agi hulongôgïya, nge nge pî mi ar tit mam mba tchod’a ki sun mam mba asa’at ta mi lata woyo. Hina wani, agi mba kagagi kur andaga d’a Ma didina mi hat mabuyogi ngolo zlapa ki agi adjeu dei gak didinda.

Jeremi 35:15

An nga ni sunugi azungeî man suma djok vuna pet, an nga ni sunugizi burâ ki burâ á dagi ala: Nge nge pî adigagi mi ar tit mam mba tchod’a, mi hulongîya. Agi aragi sun magi d’a tchod’a woyo, ar agi zlabagi tagi kalo ma dingâ á kud’urom mbi. Hina wani, agi mba kagagi kur andaga d’a an hagizi zlapa kabuyogi ngolod’a. Wani agi tinigi nga humagi á humba d’i, agi gagi nga yagi kä ad’un nduo mi.

Jeremi 36:3

Dam suma Juda-na a mba hum zla d’a tcho d’a an ngat kurun á lazizid’a tala a mba hulongî nge nge pî mba mi ar tit mam mba tchod’a, an mba ni vat hurun ndei yam tchila mazid’a ki tcho mazid’a zi ge d’a.

Jeremi 9:12

Sama ne ma mi wäd’u ahle ndazina ni nge ge? Sama Ma didina mi dum zlad’ina, ar mi de woi mi vad’ud’a kayam me ambasa ti b’lak keyo, kayam me ti ngal lei d’igi hur ful ma sa nga mi kal kua d’uo na na!

Ezekiyel 13:22

Agi b’lagagi hur suma d’ingêr suma an tan b’lagazi nga huruzi d’uo na ki zla magi d’a kad’a, agi nga hagi ad’enga mi suma asa’atna á d’elezi tala a hulongî woi ata tit mazi d’a tchod’a á kak karid’a d’a.

Ezekiyel 13:5

Agi igi nga á min ir gulumun ma hulut teina d’i, agi gagi nga gulumuna yam azì ma Israel-lâ tala mi tchol ad’enga ata yima durâ kur bur ma ayîna hi an Ma didinina d’a d’uo mi.

Ezekiyel 18:30

Agi Israel-lâ, ni kayam ndata ba, an mba ni kagi sariyad’a kagi nge nge pî yam tit mamba. An Salad’a Ma didina nga ni dagiya: Agi mbud’ugi hurugi yam tcho magid’a, agi hulongôgi tala ar tcho magid’a ti mbud’ugi vama b’lagagina d’uo d’a.

Ezekiyel 2:7

Le azi hum mboze a min hum mbuo pî, ang dazi zla manda, kayam azi ni suma bei hum vuna ba na.

Ezekiyel 3:17

Ang gor sana, an tining ma ndjola yam Israel-lâ. Ang mba hum zla d’a ndavunanda, ang mba gazi humazi yam zla d’a tcholï atanda mi.

Amos 3:7

Gagazi, Salad’a Ma didina nga mi le va gumun bei mi tagam mbei mazungeî mam suma djok vuna d’i.

Zakari 1:4

Ar agi lagi d’igi abuyogi ngolo suma adjeuna na d’i. Suma djok vuna a dazi ala: Ma didin ma ad’engêm kal petna mi dala: Agi hulongôgï woi kur sun magi d’a tchod’a, kur tit magi d’a ata yat tuo d’a. Wani azi hum nga d’i, a djib’er nga yam zla d’a an Ma didina ni data d’uo mi.

Malatchi 2:6

Gat ta gagazid’a nga avunaziya, a nga fe zla d’a aboina avunazi d’i; a tit ki sed’en ki halasa ki d’ingêra mi, a hulongî suma woi kur tcho mazid’a ablaud’a.

Sunda hi suma a sunuzinid’a 20:27

Kayam an dagi minda hAlonid’a woi pet, an ngeyegi nga va d’i.

1 Tasaloni’â 5:6

Kayam ndata, ar ei buri sena d’igi suma hiuna na d’i, wani ei kagei irei sik ki ndjola.